ചാർധാം റോഡിന്‍റെ വികസനത്തിന്​ കേന്ദ്രത്തിന്​ സുപ്രീംകോടതി അനുമതി; പദ്ധതി വിലയിരുത്താൻ പ്രത്യേക സമിതി

ന്യൂഡൽഹി: ചാർധാം പ്രൊജക്​ടിന്‍റെ ഭാഗമായുള്ള റോഡുകളുടെ വികസനം നടത്താൻ കേന്ദ്രസർക്കാറിന്​ അനുമതി നൽകി സുപ്രീംകോടതി. റോഡ്​ വികസനം തന്ത്രപ്രധാനമായ ആവശ്യമാണെന്ന കേന്ദ്രസർക്കാർ വാദം അംഗീകരിച്ചാണ്​ സുപ്രീംകോടതി ഉത്തരവ്​. അതിർത്തിയിലെ സുരക്ഷ കണക്കിലെടുക്കണമെന്നും സൈന്യത്തിന്​ സൗകര്യപ്രദമായി യാത്ര ചെയ്യാനുള്ള സാഹചര്യമുണ്ടാവണമെന്നും സുപ്രീംകോടതി നിരീക്ഷിച്ചു. ഇതിനായി റോഡ്​ വികസനം നടത്താമെന്നാണ്​ സുപ്രീംകോടതി നിലപാട്​.

ജസ്റ്റിസ്​ ഡി.വൈ ചന്ദ്രചൂഢ്​, ജസ്റ്റിസ്​ സൂര്യകാന്ത്​, ജസ്റ്റിസ്​ വിക്രം നാഥ്​ എന്നിവരുൾപ്പെട്ട മൂന്നംഗ ബെഞ്ചാണ്​ ഉത്തരവ്​ പുറപ്പെടുവിച്ചത്​. അതേസമയം, ഹരജിക്കാരന്‍റെ പരിസ്ഥിതിയെ സംബന്ധിച്ച ആശങ്കകളും കണക്കിലെടുക്കണമെന്നും കോടതി വ്യക്​തമാക്കി.

ഇതിനായി പദ്ധതിയുടെ പുരോഗതി വിലയിരുത്താൻ വിരമിച്ച ജഡ്​ജി അധ്യക്ഷനായ ഒരു കമ്മിറ്റിയെ സുപ്രീംകോടതി നിയമിച്ചു. ഈ കമ്മിറ്റി ഓരോ നാല്​ മാസത്തിലും റോഡ്​ നിർമ്മാണത്തിലെ പുരോഗതി കോടതിയെ അറിയിക്കണം.

പരിസ്ഥിതിലോല പ്രദേശങ്ങളിലൂടെയാണ്​ ചാർധാമിന്‍റെ ഭാഗമായ 899 കിലോ മീറ്റർ ഹൈവേ കടന്നു പോകുന്നത്​. ഗംഗോത്രി, യമുനോത്രി, കേദാർനാഥ്​, ബദരിനാഥ്​ എന്നിവയെ ബന്ധിപ്പിക്കുന്നതാണ്​ റോഡ്​. എന്നാൽ, ഹിമാലയൻ മലനിരകളിൽ ഉരുൾപ്പൊട്ടലും മണ്ണിടിച്ചലും വ്യാപകമാണ്​. റോഡ്​ വികസനം കൂടി നടപ്പിലാക്കിയാൽ ഇതിന്‍റെ തോത്​ ഉയരുമെന്നാണ്​ ആശങ്ക. തുടർന്ന്​ ഗ്രീൻ ഡൂൺ എന്ന സംഘടന ഇതുമായി ബന്ധപ്പെട്ട്​ കോടതിയെ സമീപിക്കുകയായിരുന്നു.