സുനന്ദ പുഷ്​കറിന്‍റെ മരണം: തരൂരിനെതിരെ കുറ്റം ചുമത്തണമെന്ന ഹരജി വിധി പറയാൻ മാറ്റി

ന്യൂഡൽഹി: സുനന്ദ പുഷ്​കറിന്‍റെ മരണവുമായി ബന്ധപ്പെട്ട്​ ശശി തരൂരിനെതിരെ കുറ്റം ചുമത്തണമെന്ന്​ ആവശ്യപ്പെട്ട്​ നൽകി ഹരജി വിധി പറയാൻ മാറ്റി. ഡൽഹി റോസ്​ അവന്യു കോടതിയാണ് കേസ്​ വിധി പറയാനായി മാറ്റിയത്​. ഇത്​ രണ്ടാം തവണയാണ്​ ഇത്തരത്തിൽ ഹരജിയിൽ വിധി പറയുന്നത്​ മാറ്റുന്നത്​.

വെർച്വലായാണ്​​ കേസിന്‍റെ അവസാനഘട്ട വാദങ്ങൾ നടന്നത്​. പ്രത്യേക കോടതി ജഡ്​ജി ഗീതാഞ്​ജലി ഗോയൽ ഏപ്രിൽ 12നാണ്​ ഹരജി വിധി പറയാനായി മാറ്റിയത്​. മുതിർന്ന അഭിഭാഷകൻ വികാസ്​ ഫവയാണ്​ ശശി തരൂരിന്​ വേണ്ടി ഹാജരായത്​. അഡിഷീൽ പബ്ലിക്​ പ്രോസിക്യൂട്ടർ അതുൽ ശ്രീവാസ്​തവയാണ്​ സർക്കാറിനെ പ്രതിനിധീകരിച്ച്​ ഹാജരായത്​.

2014 ജനുവരിയിലാണ്​ സുനന്ദ പുഷ്​കറിനെ മരിച്ച നിലയിൽ കണ്ടെത്തിയത്​. കേസിൽ ശശി തരൂരിനെതിരെ ആത്​മഹത്യ പ്രേരണക്കോ കൊലപാതകത്തിനോ കുറ്റം ചുമത്തണമെന്നാണ്​ പൊലീസ്​ ആവശ്യം.