ബാറിനെതിരെ വിദ്യാർഥികൾ സമരത്തിൽ

മംഗളൂരു: സ്കൂളിന് സമീപം ദൂരപരിധി ലംഘിച്ച് ബാർ അറ്റാച്ച്ഡ് ഹോട്ടലിന് അനുമതി നൽകിയതിനെതിരെ സമരവുമായി വിദ്യാർഥികൾ. പുന്യകൊടി ശാരദ വിദ്യ ഗണപതി വിദ്യാ കേന്ദ്രത്തിലെ വിദ്യാർഥികളാണ് അനിശ്ചിതകാല സമരം ആരംഭിച്ചത്.

നഗര പ്രാന്തത്തിലെ ബലെപുനി ഗ്രാമപഞ്ചായത്തിൽ സർക്കാർ മാനദണ്ഡങ്ങൾ പാലിക്കാതെയാണ് മദ്യശാലക്ക് അനുമതി നൽകിയതെന്ന് സ്കൂൾ മാനേജ്മെന്റ് ബോർഡ് പ്രസിഡന്റ് രാജറാമ ഭട്ട് മാധ്യമപ്രവർത്തകരോട് പറഞ്ഞു. വിദ്യാലയത്തിന്റെ 100 മീറ്റർ പരിധിക്കുള്ളിലാണ് ബാർ തുടങ്ങുന്നത്.

അനുമതി റദ്ദാക്കും വരെ സമരം ചെയ്യുമെന്ന് സ്കൂൾ ലീഡർ രശ്മിത അറിയിച്ചു. ഈ ആവശ്യം ഉന്നയിച്ച് പഞ്ചായത്ത് പ്രസിഡന്റ് സറീനക്ക് നിവേദനം നൽകി.