കോടതി തടസ്സപ്പെടുത്തിയുള്ള അഭിഭാഷകരുടെ സമരം അനുചിതം -സുപ്രീംകോടതി

ന്യൂഡൽഹി: ബാർ അസോസിയേഷനോ ബാർ കൗൺസിലോ സമരത്തിന്​ ആഹ്വാനം ചെയ്​തതി‍െൻറ പേരിൽ അഭിഭാഷകർ കോടതിയിൽ ഹാജരാകാൻ വിസമ്മതിക്കുന്നത്​ അനുചിതവും തൊഴിലിനോടുള്ള അമാന്യതയുമാണെന്ന്​ സുപ്രീംകോടതി. കോടതി ഉദ്യോഗസ്​ഥരും സമൂഹത്തിൽ പ്രത്യേക പദവിയുള്ളവരുമായ

അഭിഭാഷകർ കോടതിയിൽ ഹാജരാകാതിരിക്കുന്നത്​ സ്വന്തം കക്ഷിയോടുള്ള ഉത്തരവാദിത്തത്തിലെ വീഴ്ചയാണെന്നും ജസ്റ്റിസ്​ എം.ആർ. ഷാ, എ.എസ്.​ ബൊപ്പണ്ണ എന്നിവരുടെ ബെഞ്ച്​ പറഞ്ഞു. സെപ്​റ്റംബർ 21 ന്​ രാജസ്​ഥാൻ ഹൈകോടതിയിലെ അഭിഭാഷകർ സമരം നടത്തിയതിനെതിരായ ഹരജി പരിഗണിക്കുകയായിരുന്നു കോടതി.

കോടതിയുടെ സുഗമമായ പ്രവർത്തനം ഉറപ്പാക്കാൻ ബാധ്യസ്​ഥരാണ്​ അഭിഭാഷകർ. അവർ സമരം നടത്തുന്നത്​ നീതിനിർവഹണത്തെ തടസ്സപ്പെടുത്തും. സമരത്തിന്​ ആഹ്വാനം ചെയ്​ത ഹൈകോടതി ബാർ അസോസിയേഷൻ ഭാരവാഹികൾക്ക്​ നോട്ടീസ്​ അയച്ച കോടതി, അഭിഭാഷകർ കോടതി നടപടികൾ തടസ്സപ്പെടുത്തുന്നത്​ അംഗീകരിക്കാനാകില്ലെന്നും വ്യക്തമാക്കി. രാജസ്​ഥാൻ ഹൈകോടതിയിൽ മാത്രമാണ്​ സമരം നടന്നതെന്ന​ ബാർ കൗൺസിൽ ചെയർമാൻ മനൻ കുമാർ മിശ്രയുടെ വാദവും കോടതി തള്ളി.