ഹഥ്​രസ്​ യാത്രക്കിടെ രാഹുലും പ്രിയങ്കയും കസ്​റ്റഡിയിൽ

ലഖ്​നോ: ഉത്തർപ്രദേശിലെ ഹഥ്​രസിൽ കൂട്ടബലാത്സംഗത്തിനിരയായി കൊല്ലപ്പെട്ട ദലിത്​ പെണ്‍കുട്ടിയുടെ വീട്ടിലേക്ക് തിരിച്ച കോൺഗ്രസ് നേതാക്കളായ രാഹുൽ ഗാന്ധിയേയും പ്രിയങ്ക ഗാന്ധിയേയും പൊലീസ് കസ്​റ്റഡിയിലെടുത്തു. ഗ്രേറ്റർ നോയിഡയിൽ വെച്ച്​ ഇവർ സഞ്ചരിച്ച വാഹനം പൊലീസ്​ തടഞ്ഞതിനെ തുടർന്ന്​ കാൽനടയായി പോകുന്നതിനിടെയാണ്​ സംഭവം. രാഹുലും പ്രിയങ്ക പ്രവര്‍ത്തകരോടൊപ്പം ഏറെ ദൂരം നടന്നിരുന്നു. നിരോധനാജ്ഞ ലംഘിച്ചതിനാണ്​ നേതാക്കളെ കസ്​റ്റഡിയിലെടുത്തത്​.

അതിർത്തി​യിൽ വെച്ചാണ്​ ഉത്തർപ്രദേശ്​ പൊലീസ്​ രാഹുലി​െൻറയും പ്രിയങ്കയുടെയും വാഹനം തടഞ്ഞത്​. തുടർന്ന്​ പൊലീസ്​ ലാത്തി വീശുകയും രാഹുലിനെ തള്ളിമാറ്റാൻ ശ്രമിക്കുകയും ചെയ്​തു. ഇത്​ സംഘർഷത്തി​നിടയാക്കി. ലാത്തിചാർജിൽ കോൺഗ്രസ്​ പ്രവർത്തകർക്ക്​ പരിക്കേറ്റു.

​ ഹഥ്​രസിൽ നിന്ന്​ 142 കിലോമീറ്റർ അകലെ വെച്ചാണ്​ യു.പി പൊലീസ്​ കോൺഗ്രസ്​ നേതാക്കളുടെ വാഹനം തടഞ്ഞത്​. ​പൊലീസ് തടഞ്ഞതോടെ ​ വാഹനത്തിൽ നിന്ന്​ പുറത്തിറങ്ങിയ നേതാക്കൾ ഒപ്പമുണ്ടായിരുന്ന പ്രവർത്തകർക്കും അംഗരക്ഷകർക്കുമൊപ്പം യമുന എക്സ്പ്രസ് ഹൈവേയിലൂടെ നടക്കുകയായിരുന്നു. മാധ്യമ പ്രവർത്തകർ കൂടി എത്തിയ​തോടെ സ്ഥലത്ത്​ കൂടൂതൽ പൊലീസുകാരെ വിന്യസിക്കുകയായിരുന്നു.

ഇന്ന്​ രാവിലെ മുതൽ പെൺകുട്ടിയുടെ വീട്ടിലേക്ക് ആരെയും കടത്തിവിടാതെ പൊലീസ് വഴിതടഞ്ഞിരുന്നു. വീടിന് ഒന്നര കിലോമീറ്റര്‍ ചുറ്റളവിലുള്ള എല്ലാ റോഡുകളും അടച്ചു. പുറത്തുനിന്ന് ആര്‍ക്കും വീട്ടുകാരെ ബന്ധപ്പെടാന്‍ കഴിയാത്ത രീതിയില്‍ പൊലീസ് നിലയുറപ്പിച്ചിരിക്കുകയാണ്​. കിലോമീറ്ററുകൾ അകലെ നിന്നു തന്നെ മാധ്യമസംഘത്തെയും രാഷ്ട്രീയ പ്രവര്‍ത്തകരെയും പൊലീസ് തടയുന്ന അവസ്ഥയാണ്​. ജില്ലാ കലക്​ടർ സ്ഥലത്ത്​ നിരോധനാജ്ഞ പുറപ്പെടുവിച്ചിരുന്നു.

കുടുംബത്തിന്‍റെ അനുമതിയില്ലാതെ മൃതദേഹം സംസ്കരിച്ചതില്‍ രാജ്യവ്യാപക പ്രതിഷേധം ഉയരുന്ന സാഹചര്യത്തിലാണ് പൊലീസിന്‍റെ വഴി തടയൽ നടപടി.