ജമ്മു-കശ്മീരിന് സംസ്ഥാന പദവി തിരികെ നൽകും -പ്രധാനമന്ത്രി

ശ്രീനഗർ: ജമ്മു-കശ്മീരിന്റെ സംസ്ഥാന പദവി പുനഃസ്ഥാപിക്കുമെന്ന വാഗ്ദാനം നിറവേറ്റുമെന്ന് പ്രധാനമന്ത്രി നരേന്ദ്ര മോദി. മൂന്ന് കുടുംബങ്ങൾ ഇവിടെ അധികാരം കൈയടക്കിവെച്ചിരിക്കുകയാണെന്ന് തെരഞ്ഞെടുപ്പ് റാലിയിൽ മോദി ആരോപിച്ചു.

കശ്മീരിലെ യുവാക്കളുടെ കൈയിൽ കല്ലും വടിയും നൽകിയത് ഈ കുടുംബങ്ങളാണ്. ഇന്ന് അവരുടെ കൈയിൽ പുസ്തകവും ലാപ്ടോപ്പുമാണ്. വോട്ട് ചെയ്താലും ഇല്ലെങ്കിലും അധികാരം ഈ കുടുംബങ്ങളുടെ കൈകളിലെത്തും എന്നതായിരുന്നു സ്ഥിതി.കഴിഞ്ഞ അഞ്ച് വർഷത്തിനിടെ ജമ്മു- കശ്മീരിൽ കാര്യങ്ങളൊക്കെ മാറി. ഭീകരതയുടെ നിഴലിലല്ലാതെ ആദ്യമായാണ് ഇവിടെ തെരഞ്ഞെടുപ്പ് നടക്കുന്നതെന്ന് മോദി കൂട്ടിച്ചേർത്തു.

ബുധനാഴ്ചയായിരുന്നു ആദ്യഘട്ട തെരഞ്ഞെടുപ്പ്. രണ്ടും മൂന്നും ഘട്ടങ്ങൾ സെപ്റ്റംബർ 25നും ഒക്ടോബർ എട്ടിനുമാണ്. ഒക്ടോബർ എട്ടിനാണ് വോട്ടെണ്ണൽ.