പ്രണയാഭ്യർത്ഥന നിരസിച്ചു: യുവാവ്​ പതിനഞ്ചുകാരിയുടെ കൈവെട്ടിയെടുത്തു

ലക്​നോ: ഉത്തർപ്രദേശിൽ പ്രണയാഭ്യർത്ഥന നിരസിച്ച പെൺകുട്ടിയുടെ കൈ യുവാവ്​ വെട്ടിയെടുത്തു.  ലഖിംപുർ ജില്ലയിൽ ബുധനാഴ്​ചയാണ്​ സംഭവം. ഒമ്പതാം ക്​ളാസുകാരിയെ പിന്തുടർന്ന അക്രമി അവളെ തള്ളിവീഴ്​ത്തി  വാളുകൊണ്ട്​ വലതുകൈ വെട്ടുകയായിരുന്നു. അക്രമി 19 കാരനായ രോഹിത്തിനെ ജനങ്ങൾ പിടികൂടി പൊലീസിൽ ഏൽപ്പിച്ചു. 

ബുധനാഴ്​ച മൂന്നു മണിയോടെ ചന്തയിലെത്തിയ ​പെൺകുട്ടിയെ തടഞ്ഞു നിർത്തി ഇയാൾ അനുനയിപ്പിക്കാൻ ശ്രമിച്ചു. എന്നാൽ പെൺകുട്ടി വഴങ്ങാത്തതിൽ കുപിതനായ ഇയാൾ വെൽഡിങ്​ കടയിൽ നിന്ന്​ വാളെടുത്ത്​ പിറകെ കൂടുകയായിരുന്നു. ജനതിരക്കേറിയ സ്ഥലത്തേക്ക്​ ഒാടിയ പെൺകുട്ടിയെ  തള്ളിയിട്ട അക്രമി വാളുകൊണ്ട്​  വലതുകൈ വെട്ടിമാറ്റി. സംഭവമറിയാതെ തരിച്ചുനിന്ന ജനക്കൂട്ടം അക്രമി വീണ്ടും പെൺകുട്ടിയെ വെട്ടുന്നതിന്​ മുമ്പ്​ കൂട്ടംചേർന്ന്​ മർദിച്ച്​ കീ​ഴടക്കി. 

പെണ്‍കുട്ടിയെ ഉടൻ തന്നെ ജില്ലാ ആശുപത്രിയിൽ പ്രവേശിപ്പിച്ചതെങ്കിലും രക്തം ഏറെ വാര്‍ന്നു പോയിരുന്നതിനാല്‍ ലക്​നോവിലെ സ്വകാര്യ ആശുപത്രിയിലേക്ക് മാറ്റുകയായിരുന്നു. ഇവരുടെ നില ഗുരുതരമാണ്. 

കുറെ നാളായി രോഹിത്തി​​െൻറ ​ പ്രണയാഭ്യര്‍ത്ഥന പെണ്‍കുട്ടി നിരാകരിക്കുകയായിരുന്നു. പെണ്‍കുട്ടി മാതാപിതാക്കളോട് ഇതേ കുറിച്ച്​ പരാതി പറയുകയും ചെയ്തിരുന്നു. 
യുവാവിനെ പൊലീസ് അറസ്​റ്റു ചെയ്​തു. 
അടുത്തകാലത്ത് ഉത്തര്‍ പ്രദേശില്‍ പെണ്‍കുട്ടികള്‍ക്ക് നേരെയുള്ള അക്രമ സംഭവങ്ങള്‍ പതിവായിട്ടുണ്ട്. കഴിഞ്ഞ ആഴ്​ച ബാലിയയിൽ വിദ്യാർഥിയെ പിന്തുടർന്ന്​ കുത്തികൊലപ്പെടുത്തിയിരുന്നു.