രാജ്യത്ത്​ 24 മണിക്കൂറിനുള്ളിൽ 134 മരണം; കോവിഡ്​ ബാധിതരുടെ എണ്ണം 78000 കടന്നു

ന്യൂഡൽഹി: രാജ്യത്ത്​ കഴിഞ്ഞ 24 മണിക്കൂറിനുള്ളിൽ റിപ്പോർട്ട്​ ചെയ്​തത്​ 134 കോവിഡ്​ മരണങ്ങൾ. 3722 പേർക്കാണ്​ പുതുതായി കോവിഡ്​ വൈറസ്​ ബാധ സ്ഥിരീകരിച്ചത്​. ഇതോടെ ഇന്ത്യയിലെ കോവിഡ്​ ബാധിതരുടെ എണ്ണം 78,003 ആയി ഉയർന്നു. രാജ്യത്തെ കോവിഡ്​ മരണസംഖ്യ 2549 ആയി.

കേന്ദ്ര ആ​േരാഗ്യ-കുടുംബക്ഷേമ മന്ത്രാലയത്തി​​​െൻറ കണക്കനുസരിച്ച്​ 49,219 പേരാണ്​ ചികിത്സയിൽ കഴിയുന്നത്​​. 26235 പേർ രോഗമുക്തി നേടി. പ്രതിദിനം 33 ശതമാനം പേര്‍ രോഗമുക്തരാകുന്നവെന്നാണ് കേന്ദ്ര ആരോഗ്യമന്ത്രാലയത്തിൻെറ  റിപ്പോര്‍ട്ട്. 

ഇന്ത്യയിൽ ഏറ്റവും കൂടുതൽ കോവിഡ്​ കേസുകൾ റിപ്പോർട്ട്​ ചെയ്​ത മഹാരാഷ്​ട്രയിൽ ആകെ രോഗബാധിതരുടെ എണ്ണം 25000 കടന്നു. 25922 പേർക്കാണ്​ കോവിഡ്​ സ്ഥിരീകരിച്ചത്​. 975 പേർ മരണത്തിന്​ കീഴടങ്ങി. സംസ്ഥാനത്ത്​ 5547 പേരാണ്​ രോഗമുക്തി നേടിയത്​. ഗുജറാത്തിലും രാജസ്ഥാനിലും പശ്ചിമബംഗാളിലും കോവിഡ്​ മരണസംഖ്യ ഉയരുകയാണ്​.

ഗുജറാത്തിൽ 9267 പേർക്ക്​ കോവിഡ്​ ബാധ സ്ഥിരീകരിച്ചു. മരിച്ചവരുടെ എണ്ണം 566 ആയി.  3562 പേർ രോഗമുക്തി നേടി. മധ്യപ്രദേശിൽ 4173 പേർ രോഗബാധിതരാവുകയും പേർ മരിക്കുകയും ചെയ്​തു. രാജസ്ഥാനിൽ 4328 കോവിഡ്​ ബാധിതരും 121 ​ മരണങ്ങളുമാണ്​ റിപ്പോർട്ട്​ ചെയ്​തത്​. 

തലസ്ഥാന നഗരമായ ഡൽഹിയിൽ ഇതുവരെ 7998 പേർക്ക്​ കോവിഡ്​ സ്ഥിരീകരിച്ചു. 2858 പേർ രോഗമുക്തി നേടുകയും 106 പേർക്ക്​ ജീവൻ നഷ്​ടമാവുകയും ചെയ്​തു. 

തമിഴ്​നാട്ടിൽ 9227 പേർക്കാണ്​ വൈറസ്​ ബാധ സ്ഥിരീകരിച്ചിട്ടുള്ളത്​. 64  പേർ മരിച്ചു.  ഉത്തർപ്രദേശിൽ 3729 രോഗബാധിതരും 83 മരണവും റിപ്പോർട്ട്​ ചെയ്​തു. ദേശീയ ശരാശരിയേക്കാൾ മരണനിരക്കുയർന്ന പശ്ചിമബംഗാളിൽ 2290 രോഗബാധിതരിൽ 207 പേരാണ്​ മരണത്തിന്​ കീഴടങ്ങിയത്​.