രണ്ടാം വിവാഹം കഴിച്ചതിന്​ മക്കൾ പിതാവിനെ കഴുത്തറത്തു കൊന്നു

ചെന്നൈ: രണ്ടാം വിവാഹം കഴിച്ചതിന് അച്ഛനെ മക്കള്‍ കഴുത്തറത്തു കൊന്നു. അരിയാലൂര്‍ പെരിയതിരുക്കോലം സ്വദേശിയും വൈദ്യുതി വകുപ്പ് ജീവനക്കാരനുമായ കനകസഭ (52) ആണു കൊല്ലപ്പെട്ടത്. സംഭവവുമായി ബന്ധപ്പെട്ട്​ മക്കളായ ആനന്ദ് (22), വിനോദ് (23) എന്നിവരെ പൊലീസ് അറസ്റ്റു ചെയ്തു.

ആശ്രിത നിയമനം ലഭിക്കാനാണ്​ മക്കൾ പിതാവായ കനകസഭയെ കൊലപ്പെടുത്തിയതെന്നാണ്​ രണ്ടാം ഭാര്യയായ സംഗീതയുടെ ആരോപണം​. 12 വര്‍ഷം മുന്‍പാണു കനകസഭയും ആദ്യ ഭാര്യയും പിരിഞ്ഞത്. 8 വർഷമായി കുടുംബ കോടതിയിൽ വിവാഹ മോചനക്കേസ് നടന്നുവരികയാണ്. ഇതിനിടെ സംഗീതക്കൊപ്പം കനകസഭ താമസമാരംഭിക്കുകയായിരുന്നു. ആദ്യ ഭാര്യക്കൊപ്പമാണ്​ മക്കൾ താമസിക്കുന്നത്​.

കഴിഞ്ഞ ദിവസം ഇയാളെ കാണാൻ മക്കൾ എത്തിയിരുന്നെന്നും കനകസഭ മക്കളോട്​ മോശമായി സംസാരിച്ചിരുന്നുവെന്നും നാട്ടുകാര്‍ പറയുന്നു. കഴിഞ്ഞ ദിവസം രാത്രി ഡ്യൂട്ടിയിലായിരുന്ന കനകസഭയെ ഓഫിസിനു സമീപം കഴുത്തറുത്തു കൊല്ലപ്പെട്ട നിലയില്‍ കണ്ടെത്തുകയായിരുന്നു. തുടർന്ന് നടത്തിയ അന്വേഷണത്തിലാണ് മക്കൾ അറസ്റ്റിലായത്.