മൃതദേഹം കാണാൻ​ 51,000 രൂപ നൽകണമെന്ന്​ ആശുപത്രിക്കാർ; ഒടുവിൽ മകനെ പോലും കാണിക്കാതെ സംസ്​കരിച്ചു

കൊൽക്കത്ത: കോവിഡ്​ ബാധിച്ച്​ മരിച്ച പിതാവി​െൻറ മൃതദേഹം കാണിക്കണ​െമങ്കിൽ 51,000 ര​ൂപ നൽകണമെന്ന്​ ആവശ്യപ്പെട്ട്​ ആശുപത്രി അധികൃതർ. പശ്ചിമബംഗാളിലാണ്​ സംഭവം. ശനിയാഴ്​ച അർധരാത്രിയാണ് കോവിഡ്​ ബാധിച്ച്​ സ്വകാര്യ ആശുപത്രിയിൽ ചികിത്സയിലായിരുന്ന​ ഹരിഗുപ്​ത മരിച്ചത്​. ഞായറാഴ്​ച വൈകിട്ടുവരെ മരണവിവരം ആശുപത്രി അധികൃതർ അറിയിച്ചില്ലെന്ന്​ ഹരിഗുപ്​തയുടെ മകൻ സാഗർ ഗുപ്​ത പറയുന്നു.

ഞായറാഴ്​ച വൈകിട്ട്​ ആശുപത്രിയിൽനിന്ന്​ ഫോണിൽവിളിച്ച്​ പിതാവ്​ മരിച്ച വിവരം അറിയിക്കുകയായിരുന്നു. അറിയിക്കാൻ വൈകിയതെന്തെന്നെ ചോദ്യത്തിന്​ ബന്ധപ്പെടാനുള്ള നമ്പർ അറിയില്ലെന്ന മറുപടി നൽകുകയായിരുന്നുവെന്നും മകൻ പറയുന്നു.

മരണവിവരം അറിഞ്ഞശേഷം ആശുപത്രിയിൽ എത്തിയെങ്കിലും മൃതദേഹം സംസ്​കരിക്കാനായി ശ്​മശാനത്തിലേക്ക്​ കൊണ്ടുപോയി. ഉടൻ തന്നെ ശ്​മശാനത്തിലെത്തിയ ബന്ധുക്കളോട്​ മൃതദേഹം കാണണമെങ്കിൽ 51,000 രൂപ നൽകണമെന്ന്​ ആവശ്യപ്പെടുകയായിരുന്നു. എന്നാൽ ബന്ധുക്കൾ തരാൻ കഴിയില്ലെന്ന്​ അറിയിച്ചതോടെ 31,000 ആയി ചുരുക്കി. തുടർന്ന്​ കുടുംബം പൊലീസിനെ സമീപിക്കുകയായിരുന്നു. ഒരു പൊലീസുകാരനെത്തി സംസാരിച്ചപ്പോൾ മൃതദേഹം സംസ്​കരിക്കാൻ തയാറല്ലെന്ന്​ അറിയിച്ചതായും കുടുംബം പറയുന്നു.

ദൃശ്യങ്ങൾ പകർത്താൻ ശ്രമിച്ചെങ്കിലും ​മൊബൈൽ ഫോൺ തട്ടിയെടുത്തതായും ബന്ധുക്കൾ പറയുന്നു. കുടുംബം പണം നൽകാതെ വന്നതോടെ മൃതദേഹം ബന്ധുക്കൾക്ക്​ കാണിക്കാതെ സംസ്​കരിച്ചു. സംഭവത്തിൽ പരാതി നൽകാൻ ഒര​ുങ്ങുകയാണ്​ കുടുംബം.