മുംബൈയെ കർണാടകയുടെ ഭാഗമാക്കണമെന്ന്​ കർണാടക ഉപമുഖ്യമന്ത്രി; ചില ഭ്രാന്തന്മാർ പിച്ചുംപേയും പറയുകയാണെന്ന്​ ​ ശിവസേന

മുംബൈ: മുംബൈയെ കർണാടകയുടെ ഭാഗമാക്കണമെന്നു പറഞ്ഞ കർണാടക ഉപമുഖ്യമന്ത്രി ലക്ഷ്​മൺ സവാദി ചരിത്രം പഠിക്കണമെന്ന്​ ശിവസേന. കർണാടകയിലെ മറാത്തി ഭൂരിപക്ഷ പ്രദേശങ്ങൾ മഹാരാഷ്​ട്രയിൽ ലയിപ്പിക്കണമെന്ന്​ ആവശ്യപ്പെടുന്നത്​ മറാത്തി ഭാഷയെയും സംസ്​കാരത്തെയും സംരക്ഷിക്കാനാണെന്നും സവാദി ചരിത്രം മനസ്സിലാക്കണമെന്നും ശിവസേന നേതാവ്​ സഞ്​ജയ്​ റാവുത്ത്​ പറഞ്ഞു.

'ചില ഭ്രാന്തന്മാർ വെറുതെ പിച്ചുംപേയും പറയുകയാണ്​. ആര്​ ഉപമുഖ്യമന്ത്രിയായാലും, ഇത്​ രണ്ട്​ സംസ്​ഥാനങ്ങൾ തമ്മിലുള്ള പ്രശ്​നമാണെന്ന്​ അയാൾ മനസ്സിലാക്കണം. കന്നഡിഗരുടെ ഭാഷ മാറ്റാൻ മഹാരാഷ്​ട്രയിൽ ഒരിക്കലും നിർബന്ധിക്കാറില്ല. ഞങ്ങൾ മഹാരാഷ്​ട്രയിൽ കന്നട സ്​കൂളുകൾ നടത്തുകയും അവയ്​ക്ക്​ സബ്​സിഡി നൽകുകയും ചെയ്യുന്നുണ്ട്​. എന്നാൽ, കർണാടകയിലെ സ്​ഥിതി അതല്ല. ഈ പോരാട്ടം അവിടെ ഞങ്ങളുടെ ഭാഷയും സംസ്​കാരവും സംരക്ഷിക്കാനാണ്​. മഹാരാഷ്​ട്രയിലെ മുഖ്യമന്ത്രി ഒരു താക്കറെയാണെന്ന്​ കർണാടക ഓർമിക്കുന്നത്​ നന്നാകും' -റാവുത്ത്​ പറഞ്ഞു.

ബെൽഗാം, കാർവാർ, നിപ്പനി തുടങ്ങിയ കർണാടകയിലെ മറാത്തി ഭൂരിപക്ഷ പ്രദേശങ്ങൾ അതിർത്തി തർക്കം പരിഹരിക്കുംവരെ കേന്ദ്രഭരണ പ്രദേശമാക്കണമെന്ന്​ ആവശ്യപ്പെട്ട്​ കോടതിയെ സമീപിക്കുമെന്ന്​ കഴിഞ്ഞ ദിവസം മഹാരാഷ്​ട്ര മുഖ്യമന്ത്രി ഉദ്ധവ്​ താക്കറെ പറഞ്ഞിരുന്നു. ഇതിന്​ മറുപടിയായാണ്​ കർണാടക ഉപമുഖ്യമന്ത്രി ലക്ഷ്​മൺ സവാദി മുംബൈയെ കർണാടകയിൽ ലയിപ്പിക്കണമെന്നും അതുവരെ മുംബൈ കേന്ദ്ര ഭരണ പ്രദേശമാക്കണമെന്നും ആവശ്യപ്പെട്ടത്​.

സവാദിയുടെ പ്രസ്​താവന അസംബന്ധമാണെന്നും കർണാടകയിലെ ജനങ്ങളുടെ കണ്ണിൽ പൊടിയിടാനുള്ള തന്ത്രമാണെന്നും മഹാരാഷ്​ട്ര ഉപമുഖ്യമന്ത്രി അജിത്​ പവാർ പറഞ്ഞു. കർണാടക-മഹാരാഷ്​ട്ര അതിർത്തി തർക്കം സുപ്രീംകോടതിയുടെ പരിഗണനയിൽ നടപടി കാത്തുകിടക്കെയാണ്​ ഇരു സംസ്​ഥാന നേതാക്കളും വാക്​പയറ്റിൽ ഏർപ്പെട്ടത്​.