ഓക്​സിജൻ ചോദിച്ചപ്പോൾ കോവിഡ്​ രോഗികളെ ആൽമരത്തിന്‍റെ ചുവട്ടിലിരുത്താൻ നിർദേശിച്ച്​ യു.പി​ പൊലീസ്​

ലഖ്​നോ: ഉത്തർപ്രദേശിലെ പ്രയാഗ്​രാജിൽ രോഗികളും ബന്ധുക്കളും ഒാക്​സിജൻ വേണമെന്ന്​ ആവശ്യപ്പെട്ടപ്പോൾ ആൽമരത്തിന്​ കീഴിലിരിക്കാൻ നിർദേശിച്ച്​ അധികൃതർ. ആൽമരത്തിന്​ കീഴിലിരുന്നാൽ ഒാക്​സിജൻ അളവ്​ വർധിപ്പിക്കുമെന്നാണ് പൊലീസിന്‍റെ​ നിർദേശം.

രോഗികളായ ബന്ധുക്കൾ ഓക്​സിജൻ ലഭിക്കാനായി കേഴു​േമ്പാൾ പൊലീസ്​ നൽകിയ വിചി​ത്ര നിർദേശത്തിന്​ മുമ്പിൽ പകച്ചുപോയതായി ബന്ധുക്കൾ പറയുന്നു.

പ്രയാഗ്​രാജ്​ ബി.ജെ.പി എം.എൽ.എമായ ഹർഷവർധൻ വാജ്​പേയിയുടെ ഓക്​സിജൻ പ്ലാൻറിന്​ മുമ്പിൽ ജനങ്ങൾ തടിച്ചുകൂടിയിരുന്നു. അടുത്തിടെ എം.എൽ.എയുടെ ഓക്​സിജൻ പ്ലാന്‍റ്​ സർക്കാർ ഏറ്റെടുക്കുകയായിരുന്നു. എന്നാൽ ആശുപത്രികൾക്ക്​ ഓക്​സിജൻ നൽകുന്നതിനായിരിക്കും പ്രാധാന്യം നൽകുകയെന്നും ആളുകൾ കൂട്ടംകൂടി നിന്നിട്ടും കാര്യമില്ലെന്നുമായിരുന്നു അധികൃതരുടെ പ്രതികരണം.

ഓക്​സിജൻ സിലിണ്ടറിനായി തങ്ങൾ എവിടെപ്പോകുമെന്നും ആരോടു ചോദിക്കുമെന്നുമായിരുന്നു രോഗികളുടെ ബന്ധുക്കളുടെ ചോദ്യം. പ്രയാഗ്​രാജ്​ മുതൽ ലഖ്​നോ വരെ എല്ലാ ആശുപത്രികളിലും ശ്രമിച്ചു. മേദാന്തയിലും അപ്പോളോ ആശുപത്രിയിലും ചോദിച്ചു. ആരും രോഗികളെ പ്രവേശിപ്പിക്കുന്നില്ല, ഞങ്ങൾ എവിടെപ്പോകും -കരഞ്ഞുകൊണ്ട്​ ഒരാൾ ചോദിച്ചു. ​

രോഗികൾക്ക്​ ആവശ്യമായ ഓക്​സിജൻ സിലിണ്ടറുകളില്ലെന്ന്​ പരാതിപ്പെട്ടപ്പോൾ രോഗിയുമായി ആൽമരത്തിന്‍റെ ചുവട്ടിലിരിക്കാനും ഓക്​സിജൻ ലഭിക്കുമെന്നുമായിരുന്നു പ്രതികരണമെന്ന്​ ​ഒരാൾ പറയുന്നു. 'തന്‍റെ അമ്മയെയും കൂട്ടി ആൽമരത്തിന്​ ചുവട്ടിലിരിക്കുവെന്ന്​ ഒരു പൊലീസുകാരൻ എന്നോടുപറഞ്ഞു' -മറ്റൊരാൾ ലല്ലൻടോപ്പ്​ റിപ്പോർട്ടറോട്​ പറഞ്ഞു.

ഉത്തർപ്രദേശിൽ 75 ജില്ലകളിൽ ലഖ്​നോ ഉൾപ്പെടെ 47ലും പി.എം​ കെയർ ഉപയോഗിച്ച്​ ഓക്​സിജൻ പ്ലാൻറ്​ സ്​ഥാപിച്ചിട്ടുണ്ടെന്നാണ്​ സർക്കാറിന്‍റെ വാദം. എന്നാൽ സംസ്​ഥാനത്ത്​ ഓക്​സിജൻ ലഭിക്കാതെ മരിക്കുന്നവരുടെ എണ്ണം കുതിച്ചുയരുകയാണ്​.