ഗായിക അനുരാധ പഡ്​​വാളിൻെറ മകനും സംഗീതജ്ഞനുമായ ആദിത്യ അന്തരിച്ചു

മുംബൈ: പിന്നണി ഗായിക അനുരാധ പഡ്​വാളിൻെറ മകനും സംഗീതജ്ഞനുമായ ആദിത്യ പഡ്​വാൾ അന്തരിച്ചു. 35 വയസായിരുന്നു.

കരൾ രോഗത്തെത്തുടർന്ന്​ ഏറെ നാളായി ചികിത്സയിലായിരുന്ന ആദിത്യ മുംബൈയിലെ ആശുപത്രിയിൽ വെച്ചാണ്​ അന്ത്യശ്വാസം വലിച്ചത്​​. ഗായകൻ ശങ്കർ മഹാദേവൻ മരണവാർത്ത സ്​ഥിരീകരിച്ചു.

'മരണ വാർത്തയറിഞ്ഞ്​ ഞെട്ടിയിരിക്കുകയാണ്​. എനിക്കിത്​ വിശ്വസിക്കാനാകുന്നില്ല. ഞങ്ങളുടെ പ്രിയപ്പെട്ട ആദിത്യ പട്​വാൾ ഇനിയില്ല. എന്തൊരു മികച്ച സംഗീതജ്ഞനും മനോഹരമായ മനുഷ്യനുമായിരുന്നു അവൻ. രണ്ടു ദിവസം മുമ്പാണ്​ അവൻ പ്രോഗ്രാം ചെയ്​ത ഒരു പാട്ട്​ പാടാൻ എനിക്ക്​ സാധിച്ചത്​. ഇതുമായി പൊരുത്തപ്പെടാൻ കഴിയില്ല. സ്​നേഹം സഹോദരാ...മിസ്​ യൂ'- ശങ്കർ മഹാദേവൻ ഫേസ്​ബുക്കിൽ കുറിച്ചു.

മ്യൂസിക്​ അറേഞ്ചറും പ്രൊഡ്യൂസറുമായ ആദിത്യ നവാസുദ്ദീൻ സിദ്ദിഖിയുടെ 'താക്കറെ' എന്ന ചിത്രത്തിലാണ്​ അവസാനമായി പ്രവർത്തിച്ചത്​. മാതാവിനും സഹോദരി കവിതക്കുമൊപ്പമായിരുന്നു കഴിഞ്ഞു വന്നത്​.