കോര്‍പ്പറേറ്റുകള്‍ക്കെതിരെ 'സിം സത്യാഗ്രഹം'; ജിയോ സിം പൊട്ടിച്ചുകളഞ്ഞ്​ കർഷകരുടെ പ്രതിഷേധം

ജലന്തർ: കേന്ദ്ര സർക്കാരി​െൻറ കാർഷിക ബില്ലിനെതിരെ രാജ്യമൊട്ടാകെ പ്രതിഷേധം ശക്​തമായിരുന്നു​. കർഷക സംഘടനകൾക്കൊപ്പം പ്രതിപക്ഷ പാർട്ടികളും അണിചേർന്നായിരുന്നു സമരങ്ങൾക്ക്​ നേതൃത്വം നൽകിയത്​. കർഷക ബിൽ പാസായി നിയമമായതോടെ സിം സത്യാഗ്രഹം നടത്തിയിരിക്കുകയാണ്​ പഞ്ചാബിലെ കര്‍ഷകര്‍. കോര്‍പ്പറേറ്റുകള്‍ക്കെതിരെ പ്രതിഷേധിക്കുന്നതി​െൻറ ഭാഗമായി റിലയന്‍സ്​ ജിയോ സിം കാര്‍ഡുകള്‍ പൊട്ടിച്ചുകളഞ്ഞായിരുന്നു അവർ അരിശം തീർത്തത്​.

അമൃത്സറില്‍ നടന്ന പ്രതിഷേധത്തില്‍ കര്‍ഷകര്‍ ജിയോ സിമ്മുകള്‍ കത്തിച്ചുകളഞ്ഞിരുന്നു. സമൂഹ മാധ്യമങ്ങളിലും ജിയോ സിമ്മിനെതിരായ വ്യാപകമായ ക്യാംപയിനുകൾ നടക്കുന്നുണ്ട്​. കർഷകർക്ക്​ ​െഎക്യദാർഢ്യം പ്രഖ്യാപിച്ച്​ ചില പ്രമുഖ പഞ്ചാബ് ഗായകരും ജിയോ സിമ്മുകള്‍ നശിപ്പിക്കാൻ മുന്നിലുണ്ടായിരുന്നു. കാര്‍ഷിക നിയമത്തിലൂടെ മോദി സര്‍ക്കാര്‍ അംബാനി, അദാനി അടക്കമുള്ള കോര്‍പ്പറേറ്റുകളെ ശക്തിപ്പെടുത്തുകയാണെന്ന ആരോപണങ്ങളെ തുടർന്നയായിരുന്നു ക്യംപയിനുകള്‍ ആരംഭിച്ചത്.റിയലയന്‍സ് പമ്പുകളില്‍ നിന്ന് പെട്രോളും ഡീസലും അടിക്കരുതെന്ന ആഹ്വാനങ്ങളും സോഷ്യൽ മീഡിയയിൽ ഉയർന്നുതുടങ്ങിയിട്ടുണ്ട്​.

റിലയന്‍സ് ജിയോ നമ്പറുകള്‍ ബഹിഷ്‌കരിക്കണമെന്നും റിലയന്‍സ് പമ്പുകളില്‍ പ്രവേശിക്കരുതെന്നും ഞങ്ങള്‍ അഹ്വാനം ചെയ്യുന്നു. കോര്‍പ്പറേററുകളെ ബഹിഷ്‌കരിക്കുന്നത് കര്‍ഷകര്‍ നടപ്പിലാക്കി തുടങ്ങിയെന്നും കിസാന്‍ യൂണിയന്‍ പ്രസിഡൻറ്​ മഞ്ജിത്ത് സിങ്​ റായ് ടൈംസ് ഓഫ് ഇന്ത്യക്ക് നല്‍കിയ അഭിമുഖത്തില്‍ പറയുന്നു. നേരത്തേ ഇന്ത്യാഗേറ്റിന് സമീപം ട്രാക്ടര്‍ കത്തിച്ച് പഞ്ചാബ് യൂത്ത് കോണ്‍ഗ്രസ് പ്രതിഷേധിച്ചിരുന്നു. പഞ്ചാബിലും ഹരിയാനയിലും കര്‍ഷകര്‍ ട്രെയിന്‍ തടഞ്ഞ് പ്രതിഷേധിച്ചു. രാജ്യവ്യാപകമായി പ്രതിഷേദം ശക്തമാക്കിയിരിക്കുകയാണ് കര്‍ഷകര്‍.