പേഷവാറിൽ സിഖ്​ യുവാവ്​ കൊല്ലപ്പെട്ടു; അപലപിച്ച്​ ഇന്ത്യ

ഇസ്​ലാമാബാദ്​: പാകിസ്​താനിൽ സിഖ്​ സ്​ഥാപകൻ ഗുരുനാനാകിൻെറ ജന്മസ്​ഥലമായ നങ്കന സാഹിബിലെ ഗുരുദ്വാരയിൽ ഒരു സംഘം ആളുകൾ കല്ലേറ്​ നടത്തിയതിൻെറ സംഘർഷാവസ്​ഥ അടങ്ങും മുമ്പ്​ പേഷവാറിൽ സിഖ്​ യുവാവിനെ കൊല്ലപ്പെട്ട നിലയിൽ കണ്ടെത്തി.

ചംകാനി പൊലീസ്​ സ്​റ്റേഷൻ പരിധിയിൽ ആണ്​ 25കാരനായ പർവിന്ദർ സിങിൻെറ മൃതദേഹം ​കണ്ടെത്തിയത്​. കൊലപാതകികളെ തിരിച്ചറിഞ്ഞിട്ടില്ലെന്ന്​ പൊലീസ്​ വ്യക്​തമാക്കി. പത്രപ്രവർത്തകനായ ഹർമീത്​ സിങിൻെറ സഹോദരനാണ്​ പർവിന്ദർ സിങ്​. പാകിസ്മ​താനിലെ ആദ്യ സിഖ്​ വാർത്താ അവതാരകനാണ്​ ഹർമീത്​ സിങ്​. മലേഷ്യയിൽ ബിസിനസുകാരനായ പർവിന്ദർ ഒരുമാസം മുമ്പാണ്​ പേഷവാറിലെത്തിയത്​. ഷോപ്പിങ്​ നടത്തുന്നതിനിടെ കൊല്ലപ്പെടുകയായിരുന്നെന്നാണ്​ ലഭിച്ച വിവരമെന്ന്​ ഹർമീത്​ സിങ്​ പറയുന്നു. അടുത്ത മാസം വിവാഹം നടക്കാനിരിക്കെയാണ്​ പർവിന്ദർ കൊല്ലപ്പെട്ടത്​.

സംഭവത്തിൽ ഇന്ത്യ ശക്​തമായി അപലപിച്ചു. ഇത്തരം ഭീകരപ്രവര്‍ത്തനങ്ങളില്‍ ഏര്‍പ്പെടുന്നവരെ ഉടൻ പിടികൂടാനും മാതൃകാപരമായ ശിക്ഷ നല്‍കാനും പാകിസ്​താൻ സർക്കാർ തയാറാകണമെന്ന്​ കേന്ദ്ര വിദേശകാര്യ മന്ത്രാലയം ആവശ്യപ്പെട്ടു. മറ്റുരാജ്യങ്ങളെ ധാര്‍മികത ഉപദേശിക്കുന്നതിന് പകരം പാകിസ്​താന്‍ തങ്ങളുടെ ന്യൂനപക്ഷങ്ങളെ സംരക്ഷിക്കുന്നതിനായി പ്രവര്‍ത്തിക്കണമെന്നും വിദേശകാര്യ മന്ത്രാലയം ചൂണ്ടിക്കാട്ടി.