കാപ്പനെ ജയിലിലേക്ക്​ മാറ്റിയത്​ കോടതിയലക്ഷ്യമെന്ന്​; അടിയന്തിര നടപടി ആവശ്യപ്പെട്ട്​ യു.പി​ സർക്കാറിന്​ നോട്ടീസ് നൽകി​

യു.എ.പി.എ ചുമത്തി ജയിലിലടച്ച സിദ്ധീഖ്​ കാപ്പനെ ആശുപത്രിയിൽ നിന്ന്​ മാറ്റിയത്​ കോടതിയലക്ഷ്യമാണെന്ന്​ കാണിച്ച്​ അദ്ദേഹത്തിന്‍റെ അഭിഭാഷകൻ ഉത്തർപ്രദേശ്​ സർക്കാറിന്​ ​േനാട്ടീസ്​ നൽകി. ആറു മണിക്കൂറിനകം കാപ്പനെ ആശുപത്രിയിലേക്ക്​ മാറ്റണമെന്ന്​ കാണിച്ചാണ്​ യു.പി സർക്കാറിലെ ഉയർന്ന്​ ഉദ്യോഗസ്​ഥർക്ക്​ നോട്ടീസ്​ നൽകിയത്​.

മഥുര ജയിൽ സീനിയർ സൂപ്രണ്ടന്‍റ്​ ശൈലേന്ദ്ര കുമാർ മൈത്രേ, ആഭ്യന്തര വകുപ്പ്​ സ്​പെഷ്യൽ സെക്രട്ടറിമാരായ സത്യ പ്രകാശ്​ ഉപാധ്യയ, കുമാർ പ്രശാന്ത്​, ചീഫ്​ സെക്രട്ടറി രാജേന്ദ്ര കുമാർ തിവാരി, ഡി.ജി.പി ഹിതേഷ്​ ചന്ദ്ര അവാസ്​തി എന്നിവർക്കാണ്​ അഭിഭാഷകൻ വിൽസ്​ മാത്യൂസ്​ നോട്ടീസ്​ നൽകിയത്​. അടിയന്തിര സ്വഭാവമുള്ളത്​ എന്ന്​ കുറിപ്പ്​ വെച്ചാണ്​ നോട്ടീസ്​ നൽകിയിട്ടുള്ളത്​.

സിദ്ധീഖ്​ കാപ്പന്‍റെ മോചനവും ചികിത്സയും ആവശ്യപ്പെട്ട്​ കേരള പത്രപ്രവർത്തക യൂണിയൻ നൽകിയ ഹരജിയിൽ സുപ്രീം കോടതി ഏപ്രിൽ 29 ന്​ ഉത്തരവ്​ പുറപ്പെടുവിച്ചിരുന്നു. ആവശ്യമായ ചികിത്സ നൽകണമെന്നും അതിനായി ഡൽഹിയിലെ ആശുപത്രിയിലേക്ക്​ മാറ്റണമെന്നും കോടതി ഉത്തരവിലുണ്ടായിരുന്നു. രേഖകൾ പരിശോധിച്ചതിൽ നിന്നും കാപ്പന്‍റെ രോഗാവസ്​ഥ ബോധ്യപ്പെട്ടതിനെ തുടർന്നായിരുന്നു കോടതിയുടെ ഉത്തരവ്​. ഏ​പ്രിൽ 21 ന്​ കാപ്പൻ കോവിഡ്​ പോസിറ്റീവായെന്ന്​ ജയിൽ രേഖകളിലുണ്ടായിരുന്നു. കൂടാതെ ഉയർന്ന പ്രമേഹവും രക്​ത സമ്മർദവും ഹൃദ്രോഗവും ശരീരത്തിലേറ്റ പരിക്കുകളും കാപ്പന്‍റെ ആരോഗ്യസ്​ഥിതിയെ ബാധിച്ചതായും കോടതി കണ്ടെത്തിയിരുന്നു. ഇതിന്‍റെ അടിസ്​ഥാനത്തിലാണ്​ ഉടനെ ചികിത്സ ലഭ്യമാക്കണമെന്നും ഡൽഹിയിലേക്ക്​ മാറ്റണമെന്നും​ കോടതി ആവശ്യപ്പെട്ടത്​. ഏപ്രിൽ 30 ന്​​ കാപ്പനെ ഡൽഹി എയിംസിലേക്ക്​ മാറ്റി. കാപ്പന്​ പിന്നീട്​ കോവിഡ്​ നെഗറ്റീവായെന്നും യു.പി സർക്കാർ കോടതിയെ അറിയിച്ചിരുന്നു.

ശേഷം, കാപ്പന്‍റെ ഭാര്യ റൈഹാനത്തിന്​ അദ്ദേഹത്തെ സന്ദർശിക്കാൻ അനുമതി തേടി എയിംസ്​ അധികൃതർക്ക്​ മേയ്​ 3 ന്​ ഇ.ടി. മുഹമ്മദ്​ ബഷീർ എം.പി കത്ത്​ നൽകിയിരുന്നു. ഈ കത്തിന്​ മേയ്​ 8 ന്​ എയിംസ്​ അധികൃതർ നൽകിയ മറുപടി കാപ്പൻ കോവിഡ്​ പോസിറ്റീവാണെന്നും സന്ദർശകരെ അനുവദിക്കുന്നതിന്​ തടസമുണ്ടെന്നുമായിരുന്നു.

കാപ്പന്​ കോവിഡ്​ നെഗറ്റീവായെന്ന്​ യു.പി സർക്കാർ സുപ്രീം കോടതിയെ അറിയിച്ചത്​ അദ്ദേഹത്തിന്​ ചികിത്സ തടയാനുള്ള തന്ത്രമായിരുന്നോ എന്ന്​ അഭിഭാഷകൻ ചോദിച്ചു. കാപ്പന്‍റെ ആരോഗ്യസ്​ഥിതിയെകുറിച്ച്​ അഭിഭാഷകനോ കുടുംബത്തിനോ മേയ്​ 7 വരെയും വിവരമൊന്നും ലഭിച്ചിട്ടില്ല. മേയ്​ 7 ന്​ രാവിലെ 11.30 ന്​ സിദ്ധീഖ്​ കാപ്പൻ ഭാര്യ റൈഹാനത്തിനെ ഫോണിൽ വിളിച്ചപ്പോഴാണ്​ അർധരാത്രി ജയിലിലേക്ക്​ മാറ്റിയ വിവരം അറിയുന്നത്​. കോവിഡ്​ നെഗറ്റീവായോ എന്ന്​ അറിയില്ലെന്നും ഭക്ഷണമോ മരുന്നോ ഇല്ലാത്ത ദൈന്യാവസ്​ഥയിലാണെന്നും കാപ്പൻ​ അപ്പോൾ പറഞ്ഞിരുന്നു.

രോഗാവസ്​ഥയിൽ കാപ്പനെ ജയിലിലേക്ക്​ മാറ്റിയത്​ കോടതി ഉത്തരവിന്‍റെ ലംഘനമാണെന്നും ഉടനെ ആശുപത്രിയിലേക്ക്​ മാറ്റണമെന്നും അഭിഭാഷകൻ നൽകിയ നോട്ടീസിൽ ആവശ്യപ്പെട്ടു. ചികിത്സ ലഭ്യമാക്കണമെന്ന കോടതി ഉത്തരവിന്‍റെ ലംഘനമാണ്​ യു.പി സർക്കാറിന്‍റെ നടപടി. സർക്കാർ കോടതിയെ തെറ്റിധരിപ്പിക്കുകയാണെന്നും നോട്ടീസിൽ ചൂണ്ടികാണിച്ചു. കാപ്പന്‍റെ ചികിത്സക്കായി ചെലവഴിക്കാൻ യു.പി സർക്കാറിന്​ പ്രയാസമുണ്ടെങ്കിൽ അദ്ദേഹത്തെ കാലിക്കറ്റ്​ മെഡിക്കൽ കോളജിലേക്കോ കേരളത്തിലെ മറ്റേതെങ്കിലും ആശുപത്രിയിലേക്കോ മാറ്റാൻ ഒരുക്കമാണെന്നും അഡ്വ വിൽസ്​ മാത്യൂസ് അറിയിച്ചു.