ഗുജറാത്തിൽനിന്ന്​ കേരളത്തിലേക്കുള്ള​ ആദ്യ ശ്രമിക്​ ട്രെയിൻ ബുധനാഴ്​ചയെത്തും

അഹമ്മദാബാദ്​:  ഗുജറാത്തി​​​െൻറ വിവിധ ഭാഗങ്ങളിൽ കുടുങ്ങിയ വിദ്യാർഥികളടക്കമുള്ളവരുമായി കേരളത്തിലേക്കുള്ള ആദ്യ ശ്രമിക്​ ട്രെയിൻ ബുധനാഴ്​ചയെത്തും. ചൊവ്വാഴ്​ച പുലർച്ച 12.30ന്​ രാജ്​കോട്ടിൽനിന്ന്​ പുറപ്പെടുന്ന രാജ്​കോട്ട്​- തിരുവനന്തപുരം ശ്രമിക്​ എക്​സ്​​പ്രസ്​ ബുധനാഴ്​ച വൈകീട്ട്​ 6.25ന്​ തിരുവനന്തപുരത്തെത്തും. ചൊവ്വാഴ്​ച പുലർച്ചെ 4.25ന്​  അഹമ്മദാബാദ്, രാവിലെ 6.30ന്​  വഡോദര, രാവിലെ 8.40ന്​ സൂറത്ത്​ എന്നിവിടങ്ങളിൽനിന്ന്​ മലയാളികളുമായി യാത്ര തിരിക്കുന്ന ട്രെയിൻ  ബുധനാഴ്​ച രാവിലെ 11.15 ന്​ കോഴിക്കോടെത്തും. ഉച്ചക്ക്​-2.05ന്​ ആലുവയിലെത്തുന്ന ട്രെയിനിന്​ പിന്നീട്​ തിരുവനന്തപുരത്ത്​ മാത്രമേ സ്​റ്റോപ്​ ഉള്ളൂ.

നേരത്തെ പലകാരണങ്ങളാൽ മൂന്നു തവണ ഇൗ ട്രെയിനി​​​െൻറ യാത്ര റദ്ദാക്കിയിരുന്നു​. റെഡ്​സോൺ ആയ അഹമ്മദാബാദ്​ ഒഴിവാക്കി ട്രെയിൻ സർവിസ്​ നടത്താൻ ശ്രമിച്ചതും പ്രതിഷേധം ക്ഷണിച്ചുവരുത്തിയിരുന്നു. ശനിയാഴ്​ച പുറപ്പെടാനിരുന്ന ട്രെയിൻ അവസാന നിമിഷം ചൊവ്വാഴ്​ചയിലേക്ക്​ മാറ്റുകയായിരുന്നു. നേരത്തെ പ്രഖ്യാപിച്ച ട്രെയിനിന്​  വാപി​യിലും സ്​റ്റോപ്പ്​ അനുവദിച്ചിരുന്നു. എന്നാൽ, പുതിയ ട്രെയിനിന്​ അഹമ്മദാബാദ്​ സ്​റ്റോപ്പ്​ ഉൾപ്പെടുത്തിയപ്പോൾ വാപി സ്​റ്റേഷൻ ഒഴിവാക്കി.

ഗുജറാത്തി​​​െൻറ വിവിധ ഭാഗങ്ങളിൽനിന്നായി 1200 ഒാളം പേരാണ്​ യാത്ര തിരിക്കുന്നത്​. വിദ്യാർഥികൾ, കുഞ്ഞുങ്ങൾ, വയോധികർ, ഗർഭിണികൾ തുടങ്ങിയവർക്കാണ്​ ആദ്യ ട്രെയിനിൽ മുൻഗണന നൽകിയത്​. അഹമ്മദാബാദിൽനിന്ന്​ രജിസ്​റ്റർ ചെയ്​ത 1572 പേരിൽനിന്ന്​ തെരഞ്ഞെടുക്കപ്പെട്ട 204  പേർക്കാണ്​ യാത്രക്ക്​ അനുവാദം നൽകിയത്​. വിവിധ കാരണങ്ങളാൽ ലോക്ക്​ഡൗണിൽ കുടുങ്ങിയ നിരവധി പേർ ഇനിയും കേരളത്തിലേക്ക്​ മടങ്ങാനുണ്ട്​. വൈകാതെ മറ്റൊരു ട്രെയിൻ കൂടി ഗുജറാത്തിൽ നിന്ന്​ അനുവദിക്കുമെന്ന പ്രതീക്ഷയിലാണ്​ മലയാളികൾ.

കോവിഡ്​ 19 കേസുകൾ കൂടിവരുന്ന ഗുജറാത്തിൽ രോഗബാധയും മരണവും ഏറ്റവും കൂടുതൽ റിപ്പോർട്ട്​ ചെയ്​തത്​ അഹമ്മദാബാദ്​ നഗരത്തിലാണ്​. 14,000ത്തിലേറെ കോവിഡ്​ കേസുകളുള്ള സംസ്​ഥാനത്ത്​ ദിനേന 250 ലേറെ കേസുകളാണ്​ അഹമ്മദാബാദിൽ മാത്രം സ്​ഥിരീകരിക്കുന്നത്​. കോവിഡ്​ ബാധിതരായി രണ്ടു മലയാളികളും അഹമ്മദാബാദ്​ സിവിൽ ആശുപത്രിയൽ മരണപ്പെട്ടിരുന്നു. മേയ്​ ഏഴിന്​ ആലപ്പുഴ കാവാലം സ്വദേശി മോഹനൻ പിള്ള, മേയ്​ 21ന്​ പാലക്കാട്​ ചിറ്റിലഞ്ചേരി നീലച്ചിറ വീട്ടിൽ മോഹനകുമാരൻ എന്നിവരാണ്​ മരിച്ചത്​.