ബന്ധം പിരിയാൻ പ്രേരിപ്പിച്ചത് ശ്രദ്ധ വാൽക്കർ കേസെന്ന് നടി തുനീഷ ശർമയുടെ ആൺ സുഹൃത്ത്
text_fields
മുംബൈ: ടി.വി താരം തുനീഷ ശർമയുടെ മരണത്തിൽ പ്രതിയായ ആൺസുഹൃത്ത് ഷീസാൻ ഖാന്റെ മൊഴി പുറത്ത്. ശ്രദ്ധ വാൽക്കർ കൊലപാതകക്കേസിനു ശേഷം രാജ്യത്ത് നിലനിന്ന സാമൂഹികാന്തരീക്ഷത്തിൽ ഏറെ അസ്വസ്ഥനായിരുന്നു താനെന്നും അതാണ് തുനീഷയുമായുള്ള ബന്ധം അവസാനിപ്പിക്കാൻ ഇടയാക്കിയതെന്നും ഷീസാൻ പൊലീസിനോട് പറഞ്ഞു.
വ്യത്യസ്ത മതമാണെന്നും പ്രായവ്യത്യാസവും ഉള്ളതിനാലാണ് ബന്ധം അവസാനിപ്പിക്കാൻ തീരുമാനിച്ചതെന്നും ഷീസാൻ പറഞ്ഞു. ബന്ധം പിരിഞ്ഞ ശേഷം തുനീഷ മുമ്പും ആത്മഹത്യക്ക് ശ്രമിച്ചിട്ടുണ്ടെന്നും ഷീസാൻ പൊലീസിനോട് പറഞ്ഞു.
മരണത്തിന് കുറച്ച് ദിവസം മുമ്പും തുനീഷ ആത്മഹത്യശ്രമം നടത്തിയിട്ടുണ്ട്. ആ സമയം, താൻ അവളെ സംരക്ഷിക്കുകയും തുനീഷയുടെ അമ്മയോട് അവൾക്ക് പ്രത്യേക ശ്രദ്ധ നൽകണമെന്ന് ആവശ്യപ്പെടുകയും ചെയ്തിരുന്നെന്നും ഷീസാൻ പറഞ്ഞു.
ഡിസംബർ 24ന് ടി.വി പരിപാടിയുടെ ഷൂട്ടിങ് സൈറ്റിലെ ടോയ്‍ലറ്റിൽ തൂങ്ങി മരിച്ച നിലയിൽ തുനീഷയെ കണ്ടെത്തിയതോടെയാണ് പ്രണയ ബന്ധം തകർന്നത് ചർച്ചയായത്. സംഭവത്തിൽ ആത്മഹത്യാ പ്രേരണാകുറ്റം ചുമത്തിയാണ് ഷീസാനെ അറസ്റ്റ് ചെയ്തത്.