സൗജന്യ റേഷൻ വിതരണ കേന്ദ്രങ്ങളിൽ മോദി ചിത്രം പതിക്കണം; ബി.ജെ.പി ഭരിക്കുന്ന സംസ്​ഥാനങ്ങൾക്ക്​ നിർദേശം

ന്യൂഡൽഹി: രാജ്യത്ത്​ ബി.ജെ.പി ഭരിക്കുന്ന സംസ്​ഥാനങ്ങളിൽ സൗജന്യറേഷൻ വിതരണം ചെയ്യുന്ന കേന്ദ്രങ്ങളിൽ പ്രധാനമന്ത്രി നരേന്ദ്രമോദിയുടെയും മുഖ്യമന്ത്രിമാരുടെയും ചിത്രം പതിച്ച ബാനറുകൾ പ്രദർശിപ്പിക്കാൻ ആഹ്വാനം. പ്രധാനമന്ത്രി ഗരീബ്​ കല്യാൺ അന്ന യോജന വഴി സൗജന്യ റേഷൻ വിതരണം ചെയ്യുന്ന കേന്ദ്രങ്ങളുടെ ബാനർ പ്രദ​ർശിപ്പിക്കാനാണ്​​ നിർദേശം. കൂടാതെ റേഷൻ ബാഗുകളിൽ ബി.ജെ.പിയുടെ ചിഹ്​നമായ താമര പതിക്കണമെന്നും പാർട്ടി നിർദേശത്തിൽ പറയുന്നു.

കോവിഡ്​ 19​െൻറ രണ്ടാംതരംഗത്തിൽ ദരിദ്ര വിഭാഗങ്ങൾ സാമ്പത്തിക ബുദ്ധിമുട്ട്​ അനുഭവിക്കുന്ന സാഹചര്യത്തിൽ പ്രധാനമന്ത്രി ഗരീബ്​ കല്യാൺ അന്ന യോജന ആനുകൂല്യം നീട്ടിയിരുന്നു. ദേശീയ ഭക്ഷ്യ സുരക്ഷ നിയമത്തി​െൻറ പരിധിയിൽ വരുന്ന 80 കോടിയിലധികം ഗുണഭോക്താക്കൾക്ക്​ മാസം അഞ്ചുകിലോ ഭക്ഷ്യധാന്യം പദ്ധതി വഴി ലഭിക്കും. നവംബർ വരെയാണ്​ പദ്ധതി നീട്ടിയത്​.

ഇൗ സാഹചര്യത്തിലാണ്​​ ബി.ജെ.പിയുടെയും കേന്ദ്രത്തി​െൻറ​യും പേരിൽ ബാനറുകൾ പ്രദർശിപ്പിക്കാൻ ബി.ജെ.പി ജനറൽ സെക്രട്ടറി അരുൺ സിങ്ങി​െൻറ നിർദേശം. കേന്ദ്ര പദ്ധതിയുടെ പേര്​ ബാനറിൽ ഉൗന്നൽ നൽകണമെന്നും പറയുന്നു. കൂടാതെ നിരവധി നിർദേശങ്ങളും അതിനൊപ്പം നൽകിയിട്ടുണ്ട്​.

റേഷൻ കടകളിൽനിന്ന്​ ലഭിക്കുന്ന ബാഗിൽ താമര ചിഹ്​നം പതിച്ചിട്ടുണ്ടെന്ന്​ ഉറപ്പുവരുത്താൻ എം.പിമാർക്കും എം.എൽ.എമാർക്കും മറ്റു ബി.ജെ.പി നേതാക്കൾക്കും നിർദേശം നൽകിയിട്ടുണ്ട്​. ബി.ജെ.പി ഭരിക്കുന്ന സംസ്​ഥാനങ്ങൾ അല്ലാത്തവയിലും സഞ്ചിയിൽ ബി.ജെ.പി ചിഹ്​നം പതിക്കാനാണ്​ ആഹ്വാനം.

നിലവിൽ, കോവിഡ്​ വാക്​സിൻ സർട്ടിഫിക്കറ്റിൽ പ്രധാനമന്ത്രിയുടെ ചിത്രം പതിപ്പിച്ചിട്ടുണ്ട്​. നിരവധി പ്രതിപക്ഷ നേതാക്കൾ ഇതിനെതിരെ രംഗത്തെത്തിയിരുന്നു. കൂടാതെ ഛത്തീസ്​ഗഡ്​, പശ്ചിമബംഗാൾ തുടങ്ങിയ സംസ്​ഥാനങ്ങൾ പ്രധാനമന്ത്രിയുടെ ചിത്രം ഒഴിവാക്കി മുഖ്യമന്ത്രിയുടെ ചിത്രം ഉൾപ്പെടുത്തുകയും ചെയ്​തിരുന്നു.