സുപ്രീംകോടതി തടഞ്ഞിട്ടും കടയുടമകളുടെ പേരും മതവും വെളി​പ്പെടുത്തുന്ന ‘ഹൈടെക്’ തന്ത്രവുമായി യു.പി സർക്കാർ

ലക്നോ: കൻവാർ തീർഥാടന പാതയിലുള്ള കടകളുടെയും ധാബകളുടെയും ഉടമകളുടെ പേരുകളും അതുവഴി അവരുടെ മതവും വെളിപ്പെടുത്താൻ നിർബന്ധിക്കുന്നത് കഴിഞ്ഞ വർഷം സുപ്രീംകോടതി തടഞ്ഞിട്ടും ഉത്തരവ് മാനിക്കാതെ അതേ ലക്ഷ്യം കൈവരിക്കാൻ യു.പി സർക്കാർ നീക്കങ്ങൾ നടത്തുന്നതായി റിപ്പോർട്ട്. സാങ്കേതികവിദ്യയെ ആശ്രയിച്ചുകൊണ്ടാണ് പുതിയ രൂപത്തിലുള്ള മത ​പ്രൊഫൈലിങ്.

കൻവാർ യാത്രാ റൂട്ടുകളിലെ ധാബകളുടെയും കടകളുടെയും ഉടമകളോട് രജിസ്റ്റർ ചെയ്ത ബോർഡുകളിൽ സ്ഥാപിക്കാൻ യു.പി സർക്കാറിന്റെ ഭക്ഷ്യസുരക്ഷാ വകുപ്പ് ആവശ്യപ്പെട്ടു. കടകൾക്കായി സജ്ജീകരിച്ച ഒരു പ്രത്യേക ക്യുആർ കോഡും ഒപ്പം പ്രദർശിപ്പിക്കണം.

ഈ നൂതന ക്യു.ആർ കോഡ് ഗുണനിലവാര നിയന്ത്രണം ലക്ഷ്യമിട്ടാണെന്നും ഭക്ഷണത്തെക്കുറിച്ചോ സേവനത്തെക്കുറിച്ചോ ഫീഡ്‌ബാക്ക് നൽകാനോ പരാതികൾ നൽകാനോ ഉപഭോക്താക്കൾക്ക് ഇത് ഉപയോഗിക്കാമെന്നുമാണ് അധികൃതർ ഉന്നയിക്കുന്ന വാദം. എന്നാൽ, ഈ ക്യു.ആർ കോഡ് ഉടമയുടെ പേരും മതവും വെളിപ്പെടുത്തുന്നു.

കടയുടമകളെയും ധാബ ഉടമകളെയും കുറിച്ചുള്ള വിവരങ്ങൾ അറിയാൻ ആഗ്രഹിക്കുന്നവർക്ക് വകുപ്പിന്റെ ഡിജിറ്റൽ ആപ്ലിക്കേഷൻ വഴി ക്യു.ആർ കോഡ് സ്കാൻ ചെയ്യാനും ഉടമകളുടെ ഐഡന്റിറ്റി അറിയാനും കഴിയുമെന്ന് വകുപ്പ് പുറത്തിറക്കിയ ഉത്തരവിൽ പറയുന്നു.

കടകളുടെ സൈൻബോർഡുകളിൽ കടയുടമകൾ അവരുടെ പേര് പരാമർശിക്കണമെന്ന് നിയമമില്ലെന്നും സുപ്രീംകോടതിയും വ്യക്തിഗത ഐഡന്റിറ്റികൾ പ്രഖ്യാപിക്കുന്നതിന് എതിരാണെന്നും വകുപ്പിലെ ഒരു ഉദ്യോഗസ്ഥൻ പറഞ്ഞു. എന്നാൽ, കടകൾക്കും റസ്റ്റോറന്റുകൾക്കും രജിസ്റ്റർ ചെയ്ത പേരും നമ്പറും ഉണ്ട്. ഓരോരുത്തർക്കും ഞങ്ങൾ ഒരു ക്യു.ആർ കോഡ് നൽകുന്നു. അത് അവർ അവരുടെ ബോർഡുകളിൽ പ്രിന്റ് ചെയ്യണമെന്നും ഉദ്യോഗസ്ഥൻ പറഞ്ഞു. വകുപ്പിന്റെ മൊബൈൽ വാനുകൾ ഹൈവേകളിൽ വിന്യസിക്കപ്പെടുമെന്നും ഏതെങ്കിലും പരാതി ലഭിച്ചാലുടൻ പ്രസ്തുത ഭക്ഷണശാലയിൽ എത്തിച്ചേരുമെന്നും അദ്ദേഹം പറഞ്ഞു.

എല്ലാ വർഷവും ഒരു മാസം നീണ്ടുനിൽക്കുന്ന കൻവാർ യാത്ര, തീർത്ഥാടകർ വളരെ ദൂരം നടന്ന് ഗംഗാ ജലം ശേഖരിച്ച് ഒരു ശിവക്ഷേത്രത്തിൽ സമർപ്പിക്കുന്ന ചടങ്ങാണ്. ഉത്തർപ്രദേശിലെയും ഉത്തരാഖണ്ഡിലെയും വലിയ ഭാഗങ്ങൾ കടന്നാണ് ഈ പാതകൾ പോകുന്നത്.

കഴിഞ്ഞ വർഷം, ഈ രണ്ട് സംസ്ഥാനങ്ങളിലെയും സർക്കാറുകൾ വഴികളിലുള്ള എല്ലാ കടകളുടെയും ധാബകളുടെയും ഉടമകൾക്ക് കടകളുടെ സൈൻബോർഡുകളിൽ അവരുടെ പേരും മറ്റ് വിശദാംശങ്ങളും സ്ഥാപിക്കാൻ ഔദ്യോഗിക ഉത്തരവ് പുറപ്പെടുവിച്ചിരുന്നു.

അതേസമയം, തീർഥാടകർക്ക് അവരെ ഒഴിവാക്കാനോ ഉപദ്രവിക്കാനോ കഴിയുന്ന തരത്തിൽ മുസ്‍ലിം വ്യാപാരികളെ തിരിച്ചറിയുന്നുണ്ടെന്ന് പ്രതിപക്ഷം ആരോപിച്ചു. കൻവാർ തീർത്ഥാടകരെ ആകർഷിക്കുന്നതിനായി ഹിന്ദു ദേവന്മാരുടെയും ദേവതകളുടെയും പേരുകൾ നൽകിയിട്ടുള്ള മുസ്‍ലിം ഉടമസ്ഥതയിലുള്ള സ്ഥാപനങ്ങളെ നിരവധി ഹിന്ദുത്വ ഗ്രൂപ്പുകൾ ആക്രമിച്ചതായും റി​പ്പോർട്ടുണ്ട്.

കൻവാർ യാത്രാ പാതയിലെ ഭക്ഷണശാലകളുടെ മതപരമായ പ്രൊഫൈലിങ്ങിൽ ഏർപ്പെട്ടിരിക്കുന്ന ചില ഹിന്ദു സംഘടനകളുടെ നടപടികളെ മുൻ പാർലമെന്റ് അംഗവും മുതിർന്ന സമാജ്‌വാദി പാർട്ടി നേതാവുമായ എസ്.ടി. ഹസൻ ശക്തമായി അപലപിച്ചു. അത്തരം പ്രവൃത്തികളെ അദ്ദേഹം തീവ്രവാദമെന്ന് വിശേഷിപ്പിച്ചു.

ഹോട്ടൽ ജീവനക്കാരോടും പ്രാദേശിക കച്ചവടക്കാരോടും പേരുകൾ വെളിപ്പെടുത്താൻ ആവശ്യപ്പെടുന്നതും അവരുടെ മതം തിരിച്ചറിയാൻ അവരെ വസ്ത്രം അഴിക്കാൻ നിർബന്ധിക്കുന്നതും പഹൽഗാമിൽ തീവ്രവാദികൾ ചെയ്തതിൽ നിന്ന് വ്യത്യസ്തമല്ല. ഇതും ഒരുതരം ഭീകരതയാണ്- ഹസൻ പി.ടി.ഐയോട് പറഞ്ഞു. ഇത്തരം സംഭവങ്ങൾ പരസ്യമായി നടക്കുമ്പോൾ ഉത്തരാഖണ്ഡ് സർക്കാർ കണ്ണടക്കുകയാ​യാണെന്നും അദ്ദേഹം ആരോപിച്ചു.

‘സംസ്ഥാന സർക്കാർ ഈ പ്രവൃത്തികളെ നിശബ്ദമായി പിന്തുണക്കുന്നതായി തോന്നുന്നു. ഇന്ത്യ പോലുള്ള ഒരു മതേതര രാജ്യത്ത് ഇത്തരത്തിലുള്ള പെരുമാറ്റം ലജ്ജാകരമാണ്. ഇത് അവസാനിപ്പിക്കണം’- ഹസൻ പറഞ്ഞു. ഉത്തരാഖണ്ഡിലെ നിരവധി നഗരങ്ങളിലെ പ്രാദേശിക ഹിന്ദു സംഘടനകൾ മുസ്‍ലിംകളാണെന്ന് സംശയിക്കുന്ന വ്യക്തികളെ ലക്ഷ്യമിട്ട് ഭക്ഷണശാല ജീവനക്കാരുടെ ഐഡന്റിറ്റി പരിശോധിക്കുന്നതായി റിപ്പോർട്ടുകൾ വന്നതിനെ തുടർന്നാണ് ഈ പരാമർശം.

സോഷ്യൽ മീഡിയയിൽ പ്രചരിക്കുന്ന വിഡിയോകളിൽ സന്നദ്ധപ്രവർത്തകർ തങ്ങളുടെ മതപരമായ ഐഡന്റിറ്റി തെളിയിക്കാൻ ആളുകളെ നിർബന്ധിക്കുന്നതായി കാണിച്ചിരുന്നു. ഇത്തരം വർഗീയ ആചാരങ്ങൾ നടക്കുന്നുണ്ടെന്ന് ഉറപ്പാക്കാൻ കേന്ദ്ര-സംസ്ഥാന സർക്കാറുകൾ അടിയന്തരമായി ഇടപെടണമെന്നും ഹസൻ ആവശ്യപ്പെട്ടു.