'ഷൂട്ടര്‍ ദാദി' ചന്ദ്രോ തോമാര്‍ കോവിഡ് ബാധിച്ച്​ മരിച്ചു

മീററ്റ്​: ലോകത്തിലെ ഏറ്റവും പ്രായം കൂടിയ വനിതാ ഷാര്‍പ് ഷൂട്ടര്‍ ചന്ദ്രോ തോമാര്‍ (89) കോവിഡ് ബാധയെ തുടര്‍ന്ന് അന്തരിച്ചു. വെള്ളിയാഴ്ച മീററ്റ്​ ​മെഡിക്കൽ കോളജിലായിരുന്നു ഷൂട്ടര്‍ ദാദി എന്ന പേരിൽ പ്രശസ്​തയായ ചന്ദ്രോ തോമാറിന്‍റെ മരണം. ശ്വാസംമുട്ടല്‍ അനുഭവപ്പെട്ട ചന്ദ്രോയെ ചൊവ്വാഴ്ചയാണ് ആശുപത്രിയില്‍ പ്രവേശിപ്പിച്ചത്.

25ലേറെ ഷൂട്ടിങ് ചാമ്പ്യന്‍ഷിപ്പുകളിലെ വിജയിയായി, പ്രായം പ്രതിഭക്ക്​ തടസ്സമല്ലെന്ന്​ തെളിയിച്ചയാളാണ്​ ചന്ദ്രോ. ഉത്തര്‍പ്രദേശിലെ ബാഗ്പത് ജില്ലയിലെ ജോഹ്രി സ്വദേശിനിയാണ്. 65ാമത്തെ വയസ്സിലാണ് ആദ്യമായി തോക്ക്​ കൈയ്യിലെടുക്കുന്നത്​. ജോഹ്റിയിലെ റൈഫിള്‍ ക്ലബ്ലില്‍ കൊച്ചുമകള്‍ക്ക് കൂട്ടുപോയപ്പോളാണ്​ ചന്ദ്രോക്ക്​ ഷൂട്ടിങിൽ താൽപര്യം ജനിക്കുന്നതും പഠനം ആരംഭിക്കുന്നതും.

പിന്നെ ചന്ദ്രോ ഷാർപ്​ ഷൂട്ടറായതും ഷൂട്ടര്‍ ദാദിയായതും ചരിത്രം. സഹോദരി പരാക്ഷി തോമാറും ചന്ദ്രോക്കൊപ്പം പല മത്സരങ്ങളിലും പങ്കെടുത്തിട്ടുണ്ട്. ഇവരുടെ ജീവിത്തെ ആസ്പദമാക്കി 'സാന്ദ്​ കി ആൻഖ്' എന്ന ബോളിവുഡ്​ സിനിമയും പുറത്തിറങ്ങിയിരുന്നു.