വിശ്വാസം നേടി ശിവരാജ് സിങ്​ ചൗഹാൻ

ഭോപ്പാൽ: ബി.എസ്.പി, എസ്.പി, രണ്ട് സ്വതന്ത്ര എം‌.എൽ.‌എമാർ എന്നിവരുൾപ്പെടെ 112 എം‌.എൽ.‌എമാരുടെ പിന്തുണയോടെ മധ്യപ്ര ദേശിൽ ശിവരാജ് സിങ്​ ചൗഹാൻ സർക്കാർ വിശ്വാസവോട്ടിൽ വിജയിച്ചു. ചൊവ്വാഴ്​ച വിധാൻ സഭയിൽ നടന്ന വോ​ട്ടെടുപ്പ്​ ക ോൺഗ്രസ്​ ബഹിഷ്​കരിച്ചു. 92 കോൺഗ്രസ് എം‌.എൽ.‌എമാരും ഹാജരായില്ല.

തങ്ങളുടെ മുഴുവൻ ശ്രദ്ധയും കൊറോണ വൈറസിനെ നേരിടുന്നതിൽ കേന്ദ്രീകരിക്കുമെന്ന്​​ ചൗഹാൻ പറഞ്ഞു. തുടർച്ചയായി 15 വർഷം മധ്യപ്രദേശ് മുഖ്യമന്ത്രിയായിരുന്ന ഇദ്ദേഹം ഒന്നര വർഷത്തെ ഇടവേളയ്ക്കു ശേഷമാണ് വീണ്ടും അധികാരത്തിലേറിയത്. തിങ്കളാഴ്​ച രാത്രി 9 മണിക്കായിരുന്നു സത്യപ്രതിജ്​ഞ. രാജ്ഭവനിൽ നടന്ന ചടങ്ങിൽ ഗവർണർ ലാൽജി ടണ്ഠൻ സത്യവാചകം ചൊല്ലിക്കൊടുത്തു.

ജോതിരാദിത്യ സിന്ധ്യയും 22 എംഎൽഎമാരും കോൺഗ്രസിൽനിന്നു രാജിവെച്ച്​ ബി.ജെ.പിയിൽ ചേർന്നതോടെയാണ് മധ്യപ്രദേശിൽ കോൺഗ്രസ്​ സർക്കാർ താഴെ വീണത്. തുടർന്ന്​ കഴിഞ്ഞ വ്യാഴാഴ്ച കോൺഗ്രസ് നേതാവ് കമൽനാഥ് മുഖ്യമന്ത്രി സ്ഥാനം രാജിവച്ചു. 24 മണിക്കൂറിനുള്ളിൽ വിശ്വാസവോട്ടു നേടണമെന്ന സുപ്രീം കോടതി ഉത്തരവിനു പിന്നാലെയായിരുന്നു രാജി.