ഛോട്ടാ രാജന്‍റെ മരുമകൻ ഫോണിലൂടെ ഭീഷണി മുഴക്കിയതായി എം.എൽ.എയുടെ പരാതി

മുംബൈ: അധോലോക കുറ്റവാളി ഛോട്ടാ രാജന്‍റെ മരുമകനിൽനിന്ന്​ ഭീഷണി സന്ദേശം ലഭിച്ചതായി മഹാരാഷ്​ട്രയിലെ ശിവസേന എം.എൽ.എയുടെ പരാതി. നന്ദഗാവ്​ മണ്ഡലത്തിലെ എം.എൽ.എയായ സുഹാസ്​ കന്ദേയുടേതാണ് പരാതി.

തിങ്കളാഴ്​ച രാവിലെ ഛോട്ടാ രാജന്‍റെ മരുമകനിൽനിന്ന്​ മൊബൈൽ ഫോണിൽ ഭീഷണി സന്ദേശം ലഭിച്ചു. എം.എൽ.എയുടെ പരാതിയിൽ പറയുന്നതായി നാസിക്​ ​പൊലീസ്​ കമീഷണർ ദീപക്​ പാണ്ഡെ പറഞ്ഞു.

ഛോട്ടാ രാജന്‍റെ മരുമകൻ അക്ഷയ്​ നികാൽജെയാണെന്ന്​ ഫോൺ വിളിച്ചയാൾ അറിയിച്ചു. ബോംബെ ഹൈകോടതിയിൽ നൽകിയിരുന്ന പരാതി പിൻവലിക്കണമെന്ന്​ ആവശ്യ​െപ്പട്ടു.

നാസിക്​ ജില്ല പ്ലാനിങ്​ കമ്മിറ്റി ഫണ്ട്​ തുല്യമായി വീതംവെച്ചില്ലെന്നതാണ്​ പരാതി. ഇത്​ പിൻവലിച്ചി​ല്ലെങ്കിൽ എം.എൽ.എയും കുടുംബവും അതിന്‍റെ പ്രത്യാഘാതം അനുഭവിക്കേണ്ടിവരുമെന്ന്​ മു​ന്നറിയിപ്പ്​ നൽകിയതായും പരാതിയിൽ പറയുന്നു. സംഭവത്തിൽ പൊലീസ്​ കേസെടുത്ത്​ അന്വേഷണം ആരംഭിച്ചു.