വിവാഹം കഴിക്കാൻ വിസമ്മതിച്ചതിന്​ യുവതിയെ സഹജീവനക്കാരൻ   കുത്തിക്കൊന്നു

ഹൈദരാബാദ്​: വിവാഹം കഴിക്കാൻ വിസമ്മതിച്ചതിന്​ സൂപ്പർമാർക്കറ്റ്​ ജീവനക്കാരിയായ യുവതിയെ സഹജീവനക്കാരൻ കുത്തിക്കൊന്നു. സൂപ്പർമാർക്കറ്റ്​ ജീവനക്കാരിയായ ബോനു ജാനകി (24) ആണ്​ കൊല്ലപ്പെട്ടത്​. വിവാഹം കഴിക്കണമെന്ന്​ ആവശ്യപ്പെട്ട് സഹപ്രവർത്തകനായ ആനന്ദ്​ ആനന്ദപ്പ നിരന്തരമായി ജാനകിയെ ശല്യപ്പെടുത്താറുണ്ടായിരുന്നു. ഇത്​ സംബന്ധിച്ച്​ സഹജീവനക്കാരോട്​ ജാനകി പരാതി പറയാറുമുണ്ടായിരുന്നു.   വിവാഹം നിരസിച്ചതാണ്​ ക്രൂരമായ കൊലപാതകത്തിലേക്ക്​ നയിച്ചത്​. 

നിരന്തരമായ ശല്യപ്പെടുത്തൽ ഫലം കാണാതായപ്പോൾ ആനന്ദ്​ ജാനകിയുടെ വീട്ടിൽ പോയി, യുവതിയുമായി വാക്കേറ്റത്തിലേർപ്പെടുകയും ചെയ്​തു. ഇതിനിടയിൽ അടുക്കളയിലുണ്ടായിരുന്ന കത്തി കൊണ്ട്​ മൂന്ന്​ തവണ ജാനകിയെ മാരകമായി കുത്തി പരിക്കേൽപിച്ചു. അരിശം തീരാതെ കഴുത്ത്​ ഞെരിച്ച്​ കൊല്ലാൻ ശ്രമിക്കുകയും ചെയ്​തു.  മരണാസന്ന നിലയിൽ തറയിൽ വീണു കിടക്കുകയായിരുന്നു ജാനകിയെ ജോലി കഴിഞ്ഞെത്തിയ റൂം മേറ്റ് രൂപ ആശുപത്രിയിൽ എത്തിച്ചെങ്കിലും മരണത്തിന്​ കീഴടങ്ങുകയായിരുന്നു.​

കുത്തിയതിന്​ പുറമെ അക്രമി കഴുത്ത്​ ഞെരിച്ചതാണ്​ ജാനകിയുടെ മരണത്തിന്​ കാരണമെന്ന്​ പൊലീസ്​ പറഞ്ഞു. മുറിവിൽ നിന്നും ധാരാളം രക്​തം വാർന്നതും മരണം നേരത്തെയാക്കി. ആനന്ദിനെ പൊലീസ്​ അറസ്​റ്റ്​ ചെയ്തു. 

സ്രീകുളം ജില്ലയാണ്​ ജാനകിയുടെ സ്വദേശം. മൂന്ന്​ വർഷം മുമ്പാണ്​ ജോലിക്കായി ഹൈദരാബാദിലേക്ക്​ വന്നത്​. ദരിദ്ര സാഹചര്യത്തിൽ നിന്നും വരുന്ന ജാനകിയുടെ തുച്ഛമായ വരുമാനം കൊണ്ടാണ്​​ കുടുംബം ​കഴിഞ്ഞ്​ പോകുന്നത്​. സംക്രാന്തി ഉത്സവത്തി​​​െൻറ ഭാഗമായി നാട്ടിൽ പോവാനിരുന്നതായിരുന്നു ജാനകി. 

കഴിഞ്ഞ വർഷാവസാനമായിരുന്നു സിക്കന്തരാബാദിൽ സന്ധ്യ എന്ന യുവതിയെ മുൻ സഹപ്രവർത്തകൻ പ്രണയം നിഷേധിച്ചതിനെ തുടർന്ന്​ പൊതു സ്​ഥലത്ത്​ വെച്ച്​ തീ കൊളുത്തി കൊലപ്പെടുത്തിയത്​.