വേറൊരു ബി.ജെ.പിയാകാൻ നോക്കിയാൽ കോൺഗ്രസ് വട്ടപ്പൂജ്യമാകും, ഹിന്ദുത്വയും ഹിന്ദു മതവും വേറെ -ശശി തരൂർ

ന്യൂഡൽഹി: ബി.ജെ.പിയുടെ ചെറുപതിപ്പായി മാറാൻ ശ്രമിക്കുന്നത് കോൺഗ്രസിന് അപകടകരമാണെന്നും അങ്ങിനെ സംഭവിച്ചാൽ പാർട്ടി തന്നെ ഇല്ലാതാകുമെന്നും കോൺഗ്രസ് നേതാവ് ശശി തരൂർ എം.പി. ബി.ജെ.പിയുടെ രാഷ്​ട്രീയ സന്ദേശം വെള്ളംചേർത്ത് നൽകുന്ന പാർട്ടിയല്ല കോൺഗ്രസ്​. പാർട്ടിയിൽ ഇന്ത്യൻ മതേതര മൂല്യങ്ങൾ വളരെ സജീവമാണ്​- തരൂർ പറഞ്ഞു. 'ദി ബാറ്റിൽ ഓഫ് ബിലോങ്ങിങ്' (സ്വന്തമാക്കാനുള്ള പോരാട്ടം) എന്ന അദ്ദേഹത്തിെൻറ പുതിയ പുസ്തകത്തെക്കുറിച്ച്​ പി.ടി.ഐ വാർത്ത ഏജൻസിയോട് സംസാരിക്കുകയായിരുന്നു തരൂർ.

കോൺഗ്രസിനെതിരെ ഗൗരവതരമായ രീതിയിൽ മൃദു ഹിന്ദുത്വ ആരോപണം ഉയർന്നിട്ടുണ്ട്. എങ്കിലും ബി.ജെ.പിയുടെ മറ്റൊരു രൂപമായി മാറാൻ പാർട്ടിയെ അതിലുള്ളവർ അനുവദിക്കില്ല. ഹിന്ദുത്വ പ്രത്യയ ശാസ്ത്രത്തേയും ഹിന്ദു മതത്തേയും വേർതിരിച്ച് തന്നെയാണ് കോൺഗ്രസ്​ മനസിലാക്കുന്നത്. മുൻവിധികളില്ലാതെ എല്ലാവരേയും ഉൾക്കൊള്ളുന്നതാണ് ഹിന്ദുമതം. ഹിന്ദുത്വ എന്നത് ചിലരെ മാത്രം ഉൾക്കൊള്ളുന്ന രാഷ്ട്രീയ പ്രത്യയശാസ്ത്രമാണ്. താൻ ക്ഷേത്രത്തിൽ പോയേക്കാമെങ്കിലും ഹിന്ദുത്വയുടെ ഏതെങ്കിലും രൂപത്തെ പിന്തുണക്കുന്ന ഒരാളാകില്ലെന്ന് രാഹുൽ ഗാന്ധി വ്യക്തമാക്കിയിട്ടുണ്ടെന്നും തരൂർ പറഞ്ഞു.

സിദ്ധാന്തത്തിലും പ്രയോഗത്തിലും മതേതരത്വം രാജ്യത്ത് അപകടാവസ്ഥയിലാണ്​. ഭരണത്തിലിരിക്കുന്നവർ മതേതരത്വം എന്ന വാക്ക് ഭരണഘടനയിൽ നിന്ന് എടുത്തു മാറ്റിയേക്കാം. എങ്കിലും വെറുപ്പിെൻറ ശക്തികൾക്ക് രാജ്യത്തിെൻറ മതേതര സ്വഭാവം ഇല്ലാതാക്കാൻ കഴിയില്ല. അടിസ്ഥാന സ്വഭാവംകൊണ്ട് ഭരണഘടന മതേതരമായി തുടരുമെന്നും തരൂർ കൂട്ടിച്ചേർത്തു.