ഭീകരനെന്നും ദേശവിരുദ്ധനെന്നും വിളിച്ച്​ ജയിലിൽ അതിക്രമമെന്ന്​ ശർജീൽ ഇമാം

ന്യൂഡൽഹി: ഭീകരനെന്നും ദേശവിരുദ്ധനെന്നും വിളിച്ച്​ ജയിലിൽ തനിക്കെതിരെ നടത്തുന്ന അതിക്രമങ്ങൾ തടയണമെന്നാവശ്യപ്പെട്ട്​, പൗരത്വ സമരത്തിനിറങ്ങി യു.എ.പി.എ ചുമത്തി ജയിലിലടച്ച ജെ.എൻ.യു വിദ്യാർഥി ശർജീൽ ഇമാം ഡൽഹി കോടതിയെ സമീപിച്ചു. ജൂൺ 30ന്​ അസിസ്റ്റന്‍റ്​ ജയിൽ സൂപ്രണ്ട്​ ഒമ്പതോളം തടവുകാരുമായി ത​ന്‍റെ സെല്ലിലെത്തിയാണ്​ അതിക്രമങ്ങൾ നടത്തിയതെന്ന്​ അഡ്വ. അഹ്​മദ്​ ഇബ്രാഹീം മുഖേന സമർപ്പിച്ച ഹരജിയിൽ ഇമാം ബോധിപ്പിച്ചു.

പരിശോധനക്കെന്ന പേരിൽ സെല്ലിൽ കടന്ന സംഘം പുസ്തകങ്ങളും വസ്ത്രങ്ങളും വലിച്ചെറിയുകയും ഭീകരനെന്ന​ും ദേശവിരുദ്ധനെന്നും വിളിച്ച്​ മർദിക്കുകയുമായിരുന്നു. തന്നെ മർദിക്കുന്നതിൽ നിന്ന്​ ജയിൽപുള്ളികളെ തടയാൻ അസി. സൂപ്രണ്ടിനോട്​ ആവശ്യപ്പെട്ടപ്പോൾ അദ്ദേഹം നടപടിയെടുത്തില്ല. അദ്ദേഹവും കൂടി അറിഞ്ഞാണ്​ അതിക്രമമെന്ന്​ ഇതിലുടെ വ്യക്​തമാകുന്നുവെന്ന്​ ഹരജിയിൽ തുടർന്നു.

ഇപ്പോൾനടന്ന അതിക്രമ സമയത്തെ സി.സി.ടി.വി കാമറാ ദൃശ്യങ്ങൾ സൂക്ഷിക്കണമെന്നും ഭാവിയിൽ ഇത്​ ആവർത്തിക്കാതിരിക്കാൻ നടപടി കൈകൊള്ളണമെന്നും ഹരജിയിലുണ്ട്​. അഡീഷനൽ സെഷൻസ്​ ജഡ്ജി അമിതാഭ്​ റാവത്ത്​ അവധിയിലായതിനാൽ ഹരജി പരിഗണിച്ച മറ്റൊരു ജഡ്ജി നോട്ടീസ്​ അയച്ച്​ കേസ്​ പരിഗണിക്കാനായി ജൂലൈ 14ലേക്ക്​ മാറ്റി.