ക്ഷേത്രത്തിന് സമീപം അറുത്തുമാറ്റിയ എരുമയുടെ തല; പ്രായപൂർത്തിയാകാത്ത ആളടക്കം രണ്ടു പേർ അറസ്റ്റിൽ

ന്യൂഡൽഹി: ഡൽഹിയിൽ ക്ഷേത്രത്തിന് സമീപം അറുത്തുമാറ്റിയ എരുമയുടെ തല കൊണ്ടുവച്ച സംഭവത്തിൽ പ്രായപൂർത്തിയാകാത്തവർ ഉൾപ്പെടെ രണ്ടു പേർ അറസ്റ്റിൽ. അസീം (27), പ്രായപൂർത്തിയാകാത്ത ചെറുപ്പക്കാരൻ എന്നിവരെയാണ് പൊലീസ് അറസ്റ്റ് ചെയ്തത്. വടക്കുകിഴക്കൻ ഡൽഹിയിലെ വെൽക്കം പൊലീസ് സ്റ്റേഷൻ പരിധിയിൽ വെള്ളിയാഴ്ചയായിരുന്നു എരുമയുടെ തല കണ്ടെത്തിയത്.

വെസ്റ്റ് ഘോരക് പാർക്ക് ഏരിയയിലെ ഹനുമാൻ ക്ഷേത്രത്തിന് സമീപമായിരുന്നു സംഭവം. പൊലീസെത്തിയ ശേഷമാണ് മാംസാവശിഷ്ടങ്ങൾ സ്ഥലത്തു നിന്നും മാറ്റിയത്. പ്രദേശവാസികൾ പൊലീസിൽ പരാതി നൽകിയതിനെ തുടർന്ന് നടത്തിയ അന്വേഷണത്തിൽ പ്രതികളെ പിടികൂടുകയായിരുന്നു.

സംഭവത്തിൽ പ്രതികൾക്കെതിരെ മതവികാരം വ്രണപ്പെടുത്തൽ, സ്പർധയുണ്ടാക്കാൻ ശ്രമിക്കൽ തുടങ്ങിയ വകുപ്പുകൾ പ്രകാരം കേസെടുത്തിട്ടുണ്ട്.