കർഷകരുടെ ഗതാഗതം സ്​തംഭിപ്പിക്കൽ സമരം; മെട്രോ സ്​റ്റേഷനുകൾ അടച്ചു, കൂടുതൽ സുരക്ഷവിന്യാസം

ന്യൂഡൽഹി: കേന്ദ്രസർക്കാറിന്‍റെ മൂന്ന്​ കാർഷിക നിയമങ്ങ​ൾക്കെതി​രായ പ്രക്ഷോഭങ്ങളെ അടിച്ചമർത്തുന്നതിനെതിരെ കർഷകർ ഗതാഗത സ്​തംഭിപ്പിക്കൽ സമരം പ്രഖ്യാപിച്ചതിനെ തുടർന്ന്​ ഡൽഹി മെട്രോ റെയിൽ കോർപറേഷൻ സ്​റ്റേഷനുകൾ അടച്ചിട്ടു. മൂന്ന്​ മണിക്കൂറാണ്​ കർഷകരുടെ ഗതാഗതം​ സ്​തംഭിപ്പിക്കൽ (ചക്ക ജാം) സമരം.

മണ്ഡി ഹൗസ്​, ഐ.ടി.ഒ, ഡൽഹി ഗേറ്റ്​, വിശ്വവിദ്യാലയ, ലാൽ കിലാ, ജമാ മസ്​ജിദ്​, ജൻപത്​, സെൻട്രൽ സെക്രട്ടറിയറ്റ്​, ഖാൻ മാർക്കറ്റ്​, നെഹ്​റു പാലസ്​ എന്നീ സ്​റ്റേഷനുകളാണ്​​ മുൻകരുതൽ നടപടികളുടെ ഭാഗമായി അടച്ചിട്ടത്​.

റോഡ്​ സ്​തംഭിപ്പിക്കൽ സമരത്തെ തുടർന്ന്​ കൂടുതൽ സുരക്ഷ ഉദ്യോഗസ്​ഥരെ വിന്യസിക്കുകയും ബാരിക്കേഡുകൾ സ്​ഥാപിക്കുകയും ചെയ്​തു. ഗാസിപൂർ അതിർത്തിയിൽ കൂടുതൽ കണ്ണീർ വാതക വാഹനങ്ങൾ വിന്യസിച്ചു. റിപബ്ലിക്​ ദിനത്തിലെ ട്രാക്​ടർ റാലിക്കിടെ കൂടുതൽ അക്രമ സംഭവങ്ങൾ അരങ്ങേറിയ ചെ​ങ്കോട്ടയിലും സുരക്ഷ ശക്തമാക്കി.

മൂന്നുമണിക്കൂർ സംസ്​ഥാന ദേശീയ പാതകൾ മാത്രമാണ്​ കർഷകർ സ്​തംഭിപ്പിക്കുക. ആംബുലൻസുകൾ, സ്​കൂൾ ബസുകൾ തുടങ്ങിയവ തടയില്ലെന്നും സമരം പൂർണമായും സമാധാനപരമായിരിക്കുമെന്നും കർഷക സംഘടനകൾ അറിയിച്ചിരുന്നു.