ആരോഗ്യ മന്ത്രാലയം ജോയിന്‍റ്​ സെക്രട്ടറി ലവ്​ അഗർവാളിന്‍റെ സഹോദരൻ ദുരൂഹ സാഹചര്യത്തിൽ മരിച്ച നിലയിൽ

സഹറൻപുർ: കേന്ദ്ര ആരോഗ്യ മന്ത്രാലയം ജോയിന്‍റ്​ സെക്രട്ടറിയും മുതിർന്ന ഐ.എ.എസ് ഉദ്യോഗസ്ഥനുമായ ലവ് അഗർവാളിന്‍റെ സഹോദരനെ ദുരൂഹ സാഹചര്യത്തിൽ മരിച്ച നിലയിൽ കണ്ടെത്തിയതായി യു.പി. പൊലീസ്​ അറിയിച്ചു. യു.പിയിലെ സഹറൻപുർ ജില്ലയിലെ പിൽഖാനി വ്യവസായ മേഖലയിലെ ഫാക്ടറിക്കു സമീപമുള്ള വയലിലാണ് ലവ്​ അഗർവാളിന്‍റെ സഹോദരൻ അങ്കുർ അഗർവാളിന്‍റെ മൃതദേഹം കണ്ടെത്തിയതെന്ന് സഹറൻപുർ റൂറൽ എസ്‍.പി അതുൽ ശർമ പറഞ്ഞു.

സർ‍സവ പൊലീസ് സ്റ്റേഷൻ പരിധിയിൽ തിങ്കളാഴ്ച വൈകുന്നേരമാണ്​ സംഭവം. അങ്കുറിന്‍റെ ലൈസൻസുള്ള തോക്ക് മൃതദേഹത്തിനടുത്തുനിന്നു കണ്ടെത്തിയെന്നും പൊലീസ് അറിയിച്ചു. പതിവുപോലെ തിങ്കളാഴ്ച രാവിലെ അങ്കുർ ഫാക്ടറിയിൽ ജോലിക്കു പോയിരുന്നു. ഇടക്ക്​ ഫാക്ടറിയിൽനിന്ന് ഇറങ്ങിയെങ്കിലും വൈകിട്ടുവരെ തിരിച്ചെത്തിയില്ല. തുടർന്നുള്ള തിരച്ചിലിലാണു പാടത്തിൽ മൃതദേഹം കണ്ടെത്തിയത്. മൃതദേഹം പോസ്റ്റുമോർട്ടത്തിനായി അയച്ചു. വിശദമായ അന്വേഷണം നടന്നുവരികയാണെന്ന്​ പൊലീസ്​ അറിയിച്ചു.