തൊഴിലാളികളെ 15 ദിവസത്തിനകം നാട്ടിലെത്തിക്കണം -സുപ്രീംകോടതി

ന്യൂഡൽഹി: ലോക്​ഡൗണിൽ കുടുങ്ങികിടക്കുന്ന അന്തർ സംസ്​ഥാന തൊഴിലാളികളെ കണ്ടെത്തി 15 ദിവസത്തിനകം സ്വന്തം നാട്ടിലെത്തിക്കണമെന്ന്​ സുപ്രീംകോടതി. തൊഴിലാളികൾ ആവശ്യപ്പെട്ടാൽ 24 മണിക്കൂറിനകം ശ്രമിക്​ ട്രെയിനുകൾ ഏർപ്പെടുത്തണം. ജസ്​റ്റിസ്​ അശോക്​ ഭൂഷൻ അധ്യക്ഷനായ ബെഞ്ചി​േൻറതാണ്​ നിർദേശം. 

‘ലോക്​ഡൗൺ ലംഘനത്തിനെടുത്ത കേസുകൾ പിൻവലിക്കണം’
ലോക്​ഡൗൺ ലംഘനത്തിന്​ തൊഴിലാളികൾക്കെതിരെ എടുത്ത എല്ലാ കേസുകളും പിൻവലിക്കണമെന്നും സുപ്രീംകോടതി ഉത്തരവിട്ടു. ദേശീയ ദുരന്ത നിവാരണ നിയമ​പ്രകാരമാണ്​ ലോക്​ഡൗൺ നിയന്ത്രണങ്ങൾ ലംഘിച്ചതിന്​ വിവിധ സർക്കാരുകൾ വീടുകളിലേക്ക്​ മടങ്ങാൻ ശ്രമിച്ചവർക്കെതിരെ കേസ്​ രജിസ്​റ്റർ ചെയ്​തത്​.

തൊഴിലാളികളുടെ പുനരധിവാസത്തിനായി സർക്കാരുകൾ തയാറാക്കിയ എല്ലാ പദ്ധതികളും ആനുകൂല്യങ്ങളും പരസ്യപ്പെടുത്തണം. മുൻഗണന ക്രമം അനുസരിച്ച്​ അന്തർ സംസ്​ഥാന തൊഴിലാളികളുടെ പട്ടിക തയാറാക്കാൻ കേന്ദ്ര സംസ്​ഥാന സർക്കാരുകൾക്ക്​ നിർദേശം നൽകി. നാട്ടിലേക്ക്​ മടങ്ങിയെത്തുന്ന തൊഴിലാളികൾക്ക്​ ​അവരുടെ നൈപുണ്യം അനുസരിച്ച്​ തൊഴിൽ ലഭ്യമാക്കാൻ നടപടി സ്വീകരിക്കണമെന്നും സുപ്രീംകോടതി നിർദേശിച്ചു. ഉത്തരവ്​ നടപ്പിലാക്കുന്നതിൻെറ പുരോഗതി വിലയിരുത്താൻ സ്വമേധയാ എടുത്ത ഹരജി സുപ്രീംകോടതി ജൂലൈ എട്ടിന്​ വീണ്ടും പരിഗണിക്കും.