കോവിഡ് വ്യാപനത്തിന് കാരണം ‘നമസ്‌തേ ട്രംപ്’ പരിപാടിയെന്ന്​ ശിവസേന എം.പി

മുംബൈ: യു.എസ്​ പ്രസിഡൻറ്​ ഡൊണാൾഡ്​ ട്രംപിനെ സ്വീകരിക്കാൻ ഫെബ്രുവരിയില്‍ അഹമ്മദാബാദിൽ സംഘടിപ്പിച്ച ‘നമസ്‌തേ ട്രംപ്’ പരിപാടിയാണ് ഗുജറാത്തില്‍ കൊറോണ വൈറസ് വ്യാപനത്തിനിടയാക്കിയതെന്ന് ശിവസേന എം.പി സഞ്ജയ് റാവത്ത്.

പിന്നീടത് മുംബൈയിലേക്കും ഡല്‍ഹിയിലേക്കും വ്യാപിക്കുകയായിരുന്നു. ട്രംപിനൊപ്പം വന്ന ചില പ്രതിനിധികള്‍ ഡല്‍ഹിയും മുംബൈയും സന്ദര്‍ശിച്ചതാണ്​ വ്യാപനത്തി​​െൻറ ആക്കം കൂട്ടിയതെന്നും അദ്ദേഹം ശിവസേന മുഖപത്രമായ സാമ്​നയിലെ ത​​െൻറ പ്രതിവാര കോളത്തില്‍ ആരോപിച്ചു. 

യാതൊരു മുന്നൊരുക്കങ്ങളുമില്ലാതെയാണ് കേന്ദ്രം ലോക്​ഡൗണ്‍ പ്രഖ്യാപിച്ചതെന്നും റാവത്ത്​ കുറ്റപ്പെടുത്തി. ഇപ്പോള്‍ ലോക്​ഡൗണ്‍ നിയന്ത്രണം എടുത്തുകളയാനുള്ള ചുമതല സംസ്​ഥാനങ്ങൾക്ക്​ നല്‍കി കേന്ദ്രം കൈയൊഴിയുകയാണ്​. 

‘യു.എസ്​ പ്രസിഡൻറ്​ ഡൊണാള്‍ഡ് ട്രംപിനെ സ്വാഗതം ചെയ്യുന്നതിനായി നടത്തിയ പൊതുസമ്മേളനമാണ് ഗുജറാത്തില്‍ കൊറോണ വൈറസ് വ്യാപിപ്പിച്ചതെന്നത്  നിഷേധിക്കാനാവില്ല. ട്രംപിനൊപ്പം വന്ന ചില പ്രതിനിധികള്‍ ഡല്‍ഹിയും മുംബൈയും സന്ദര്‍ശിച്ചത്​ അവിടങ്ങളിലും വൈറസ് വ്യാപനത്തിന് ഇടയാക്കി’- റാവത്ത്​ ലേഖനത്തിൽ ചൂണ്ടിക്കാട്ടി.

ഫെബ്രുവരി 24ന് ട്രംപും പ്രധാനമന്ത്രി നരേന്ദ്ര മോദിയും ചേര്‍ന്ന്​ നടത്തിയ റോഡ് ഷോ കാണാന്‍ ആയിരക്കണക്കിനാളുകളാണ് തടിച്ചുകൂടിയത്. റോഡ് ഷോയ്ക്ക് ശേഷം ഗുജറാത്ത് ക്രിക്കറ്റ് അസോസിയേഷ​ന്​ കീഴിലുള്ള മോട്ടേര ക്രിക്കറ്റ് സ്റ്റേഡിയത്തില്‍ ഒരു ലക്ഷത്തിലധികം പേരെയാണ്​ ഇരുനേതാക്കളും അഭിസംബോധന ചെയ്തത്​.

മാര്‍ച്ച് 20നാണ് ഗുജറാത്തിലെ ആദ്യ കൊറോണ വൈറസ് കേസുകള്‍ റിപ്പോര്‍ട്ട് ചെയ്യപ്പെട്ടത്. രാജ്‌കോട്ടില്‍ നിന്നുള്ള ഒരാളുടെയും സൂറത്തില്‍ നിന്നുള്ള ഒരു സ്ത്രീയുടെയും സാമ്പിളുകള്‍ കോവിഡ് പോസിറ്റീവ് ആണെന്ന് തെളിയുകയായിരുന്നു. കോവിഡ് മഹാമാരിയെ തടയുന്നതില്‍ പരാജയപ്പെട്ടുവെന്ന് ചൂണ്ടിക്കാട്ടി ഉദ്ദവ് താക്കറെ നയിക്കുന്ന മഹാരാഷ്​ട്ര വികാസ്​ അഘാഡി (എം.വി.എ) സഖ്യ സര്‍ക്കാറിനെ പിരിച്ചുവിട്ട്‌ സംസ്ഥാനത്ത് രാഷ്ട്രപതി ഭരണം ഏര്‍പ്പെടുത്താനുള്ള ഏതൊരു നടപടിയും ആത്മഹത്യാപരമാണെന്നും റാവത്ത്​ അഭിപ്രായപ്പെട്ടു.

‘ആറുമാസം മുമ്പ് രാഷ്​ട്രപതി ഭരണം എങ്ങനെയാണ് നടപ്പാക്കിയതെന്നും എടുത്തുകളഞ്ഞതെന്നുമുള്ള കാര്യത്തിന്  സംസ്ഥാനം സാക്ഷ്യം വഹിച്ചതാണ്. രാഷ്​ട്രപതി ഭരണം അടിച്ചേല്‍പ്പിക്കുന്നത് കൊറോണ വൈറസ് കേസുകള്‍ കൈകാര്യം ചെയ്യുന്നത് അടിസ്ഥാനമാക്കിയാണെങ്കില്‍ ബി.ജെ.പി ഭരിക്കുന്നവ ഉള്‍പ്പെടെ 17 സംസ്ഥാനങ്ങളില്‍ അങ്ങിനെ ചെയ്യേണ്ടി വരും. വൈറസിനെ എതിരിടാൻ ആസൂത്രണം ഇല്ലാത്തതിനാല്‍ പകര്‍ച്ചവ്യാധി തടയുന്നതില്‍ കേന്ദ്രസര്‍ക്കാര്‍ പോലും പരാജയപ്പെട്ടിരിക്കുകയാണ്​. ലോക്​ഡൗണ്‍ എന്തുകൊണ്ട് പരാജയപ്പെട്ടെന്നത്‌‌ സംബന്ധിച്ച് കോൺഗ്രസ്​ നേതാവ്​ രാഹുല്‍ ഗാന്ധി മികച്ച വിശകലനം നടത്തിയിട്ടുണ്ട്​.  കൊറോണ വൈറസ് കേസുകളുടെ വർധനവി​​െൻറ കാരണം പറഞ്ഞ്​ മഹാരാഷ്​്ട്രയില്‍ രാഷ്​ട്രപതി ഭരണം ആവശ്യപ്പെടുന്നത് നടുക്കമുളവാക്കുന്നതാണ്​’- റാവത്ത്​ പറഞ്ഞു. 

കോവിഡ്​ വ്യാപനം നേരിടുന്നതില്‍ ശിവസേനയുടെ നേതൃത്വത്തിലുള്ള സംസ്ഥാന സര്‍ക്കാറി​​െൻറ പരാജയം കണക്കിലെടുത്ത് രാഷ്​ട്രപതി ഭരണം ഏർപ്പെടുത്തണമെന്ന്​  ബി.ജെ.പി എം.പി നാരായണ്‍ റാണെ മഹാരാഷ്​ട്ര ഗവര്‍ണര്‍ ബി.എസ് കോശ്യാരിയെ സന്ദര്‍ശിച്ച്​ ആവശ്യപ്പെട്ടതിനെ പരാമർശിക്കുകയായിരുന്നു അദ്ദേഹം. സഖ്യകക്ഷികൾക്കിടയിൽ അസ്വാരസ്യങ്ങൾ ഉണ്ടെങ്കിലും എം.വി.എ സർക്കാറി​​െൻറ നിലനിൽപിന്​ ഭീഷണിയൊന്നുമില്ലെന്ന്​ റാവത്ത്​ ചൂണ്ടിക്കാട്ടി.  സർക്കാർ വീഴാതെ നോ​ക്കേണ്ടത്​ തങ്ങളുടെ നിലനിൽപിന്​ ആവശ്യമാണെന്ന്​ സഖ്യകക്ഷികൾക്കറിയാമെന്നും അദ്ദേഹം പറഞ്ഞു.