മാധ്യമ പ്രവർത്തകന്​ തീവ്രവാദി മുദ്ര: യു.പി പൊലീസ്​ നടപടിക്കെതിരെ വ്യാപക പ്രതിഷേധം

ന്യൂഡൽഹി: ദലിത്​ യുവതിയെ കൂട്ടബലാത്സംഗം ചെയ്​തു കൊന്ന ഹാഥ​റസിലെ സാഹചര്യങ്ങൾ അന്വേഷിക്കുന്നതിനു പോയ മലയാളി മാധ്യമ പ്രവർത്തകൻ സിദ്ദീഖ്​ കാപ്പനും ഒപ്പമുണ്ടായിരുന്ന മൂന്നുപേർക്കുമെതിരെ ഭീകരവിരുദ്ധ നിയമമായ യു.എ.പി.എയും രാജ്യദ്രോഹക്കുറ്റവും ചുമത്തിയ യു.പി പൊലീസ്​ നടപടിക്കെതിരെ വ്യാപക പ്രതിഷേധം.

മാധ്യമ പ്രവർത്തകനെതിരായ നടപടിയിൽ അടിയന്തര ഇടപെടൽ ആവശ്യപ്പെട്ട്​ എം.പിമാരായ ​െബന്നി െബഹനാൻ, ബിനോയ്​ വിശ്വം തുടങ്ങിയവർ പ്രധാനമന്ത്രി നരേന്ദ്ര മോദിക്ക്​ കത്തയച്ചു. എതിർപ്പി​െൻറ ശബ്​ദങ്ങൾ ഇല്ലാതാക്കാനുള്ള ശ്രമമാണ്​ നടക്കുന്നതെന്ന്​ അവർ കുറ്റപ്പെടുത്തി.

പ്രമുഖ അഭിഭാഷകരായ കപിൽ സിബൽ, പ്രശാന്ത്​ ഭൂഷൺ തുടങ്ങിയവരും നിരവധി മനുഷ്യാവകാശ പ്രവർത്തകരും യു.പി പൊലീസ്​ നടപടിയെ അപലപിച്ചു. വസ്​തുതകൾ പുറത്തു കൊണ്ടുവരാനുള്ള നിശ്ചയദാർഢ്യത്തിൽനിന്ന്​ ഇത്തരം അടിച്ചമർത്തലുകൾ മാധ്യമ പ്രവർത്തകരെ പിന്തിരിപ്പിക്കില്ലെന്ന്​ കോൺഗ്രസ്​ പറഞ്ഞു.

സുപ്രീംകോടതിയുടെ മാർഗനിർദേശ പ്രകാരമുള്ള അവകാശം നിഷേധിച്ചുകൊണ്ടാണ്​ മാധ്യമ പ്രവർത്തകനെ പൊലീസ്​ ജയിലിലാക്കിയതെന്ന്​ മുസ്​ലിം ലീഗ്​ അഖിലേന്ത്യ പ്രസിഡൻറ്​ കെ.എം. ഖാദർ മൊയ്​തീൻ, എം.പിമാരായ പി.കെ. കുഞ്ഞാലിക്കുട്ടി, ഇ.ടി. മുഹമ്മദ്​ ബഷീർ, പി.വി. അബ്​ദുൽ വഹാബ്​, കെ. നവാസ്​ കനി എന്നിവർ സംയുക്ത പ്രസ്​താവനയിൽ ചൂണ്ടിക്കാട്ടി. സ്വേച്ഛാധിപതികൾക്കു കീഴിലാണ്​ കൃത്യനിർവഹണം നടത്തുന്നവരെ ഇത്തരത്തിൽ വേട്ടയാടുകയെന്ന്​ അവർ പറഞ്ഞു.

14 ദിവസത്തെ ജുഡീഷ്യൽ കസ്​റ്റഡിയിലാണ്​ സിദ്ദീഖ്​ കാപ്പൻ അടക്കം പിടികൂടിയ നാലുപേർ. അഭിഭാഷകർക്ക്​ കാണാൻ അനുമതി ലഭിച്ചില്ല. ഇതിനിടെ, കേരള പത്രപ്രവർത്തക യൂനിയൻ സംസ്ഥാന നേതൃത്വം സമർപ്പിച്ച ഹേബിയസ്​ കോർപസ്​ ഹരജി ഈ മാസം 12ന്​ പരിഗണിക്കാൻ സുപ്രീംകോടതി തീരുമാനിച്ചു.