കോൺഗ്രസ്​ ഭരിക്കുന്ന സംസ്​ഥാനങ്ങൾ കോവിഡ്​ വ്യാപനത്തിന്​ ആക്കംകൂട്ടി -കേന്ദ്ര ആരോഗ്യമന്ത്രി

ന്യൂഡൽഹി: കേന്ദ്രസർക്കാറിന്‍റെ കോവിഡ്​ പ്രതിരോധ പ്രവർത്തനങ്ങൾക്ക്​ നിർദേശങ്ങളുമായി രംഗത്തെത്തിയ മുൻ പ്രധാനമന്ത്രി മൻമോഹൻസിങ്ങിനെ വിമർശിച്ച്​ കേന്ദ്ര ആരോഗ്യമന്ത്രി ഹർഷ വർധൻ. കോവിഡിന്‍റെ രണ്ടാംതരംഗത്തിന്​ ആക്കം കൂട്ടിയത്​ കോൺഗ്രസ്​ ഭരിക്കുന്ന സംസ്​ഥാനങ്ങളാണെന്നും കോവിഡ്​ വാക്​സിൻ വിതര​ണത്തേക്കാളുപരി വാക്​സിനെതിരെ സംശയം ജനിപ്പിക്കുന്നതിന്‍റെ തിരക്കിലാണെന്നും ഹർഷവർധൻ പറഞ്ഞു.

പ്രധാനമന്ത്രി നരേന്ദ്രമോദിക്ക്​ കത്തയച്ച മുതിർന്ന കോൺഗ്രസ്​ നേതാവിന്‍റെ നിലപാടിനോട്​ അപമാനം തോന്നുന്നുവെന്നും അദ്ദേഹം പറഞ്ഞു.

കേവിഡ്​ 19നെതിരായ യുദ്ധത്തിൽ വാക്​സി​നേഷന്‍റെ പ്രാധാന്യം മൻമോഹൻ സിങ്ങ്​ മനസിലാക്കുന്നുണ്ടെങ്കിലും ചില നേതാക്കൾ നടത്തിയ നിരുത്തരവാദിത്തപരമായ പരസ്യപ്രഖ്യാപനങ്ങൾ വാക്​സിനേഷൻ തോത്​ കുറക്കാൻ ഇടയാക്കി. ചില കോൺഗ്രസ്​ ഭരിക്കുന്ന സംസ്​ഥാനങ്ങളിൽ ആരോഗ്യപ്രവർത്തകർക്കും മുതിർന്നപൗരമാർക്കും വാക്​സിനേഷൻ ഉറപ്പാക്കിയില്ലെന്നും ഹർഷവർധൻ ആരോപിച്ചു.

'ക്രിയാത്മക സഹകരണവും വിലയേറിയ ഉപദേശങ്ങളും നിങ്ങളുടെ കോൺഗ്രസ്​ നേതാക്കാൾ ഇത്തരം അസാധാരണ കാലഘട്ടത്തിലും പിന്തുടർന്നാൽ ചരിത്രം നിങ്ങളോട്​ ദയ കാണിക്കും മൻമോഹൻ സിങ്​ ജി' -മൻമോഹൻ സിങ്ങിന്​ മറുപടിയായി ഹർഷ വർധൻ ട്വീറ്റ്​ ചെയ്​തു.

കോവിഡ്​ സംബന്ധിച്ച്​ അഞ്ചിന നിർദേശങ്ങളുമായി പ്രധാനമന്ത്രി നരേന്ദ്ര മോദിക്ക്​ മൻമോഹൻ സിങ്​ കത്തെഴുതിയിരുന്നു. വാക്​സിനേഷനുമായി ബന്ധപ്പെട്ട കാര്യങ്ങളാണ്​ മുൻപ്രധാനമന്ത്രി മൻമോഹൻ കത്തിൽ ഊന്നിപ്പറഞ്ഞത്​. കോവിഡ് വാക്സിനേഷൻ പ്രോഗ്രാം കൂടുതൽ വിപുലീകരിക്കണമെന്നും വാക്​സിൻ എടുക്കുന്നവരുടെ എണ്ണം കൃത്യമായി നിർണയിക്കണമെന്നും അദ്ദേഹം ആവശ്യപ്പെട്ടു. ആവശ്യമുള്ള വാക്​സിൻ സംബന്ധിച്ച​ കൃത്യമായ എണ്ണം കമ്പനികൾക്ക്​ കൈമാറണം. ഇതിന്‍റെ അടിസ്​ഥാനത്തിൽ വാക്​സിൻ നിർമിച്ച്​ നൽകാൻ സ്വകാര്യ കമ്പനികൾക്ക്​ നിർദേശം നൽകണമെന്നും മൻമോഹൻ കത്തിൽ പറയുന്നു.

അടുത്ത ആറ്​ മാസത്തേക്ക് ആവശ്യമുള്ള കോവിഡ് വാക്സിൻ ഓർഡറുകൾ മുൻകൂട്ടി നൽകണം. സംസ്ഥാനങ്ങൾക്ക് എങ്ങനെ വാക്സിനുകൾ വിതരണം ചെയ്യുമെന്ന മാർഗരേഖ കേന്ദ്രം പുറത്തിറക്കണമെന്നും അദ്ദേഹം നിർദ്ദേശിച്ചു. കോവിഡ് 19ന്‍റെ രണ്ടാം തരംഗത്തിൽ ഇന്ത്യ വലയുന്ന സമയത്താണ് മോദിക്ക് സിങ്​ കത്ത് എഴുതിയത്​. കഴിഞ്ഞ കുറച്ചു ദിവസങ്ങളായി പ്രതിദിന പോസിറ്റീവ് കേസുകളിൽ റെക്കോർഡ് വർധനയാണ്​ രാജ്യത്ത്​ ഉണ്ടായത്​. ഇരട്ട മ്യൂട്ടേഷൻ കാരണം രൂപ​െപ്പട്ട വൈറസിന്‍റെ പുതിയ വകഭേദമാണ്​ ഇന്ത്യയിൽ പുതിയ അണുബാധകൾക്ക് ആക്കം കൂട്ടുന്നതെന്നാണ്​ വിലയിരുത്തൽ. നിലവിൽ കോവിഡ്​ കേസുകളുടെ എണ്ണത്തിൽ ലോകത്തെ ഏറ്റവും മോശമായ രണ്ടാമത്തെ രാജ്യമായി ഇന്ത്യ മാറിയിട്ടുണ്ട്​.