ദ്വാരകയിലെ ദുരഭിമാനക്കൊല; പെൺകുട്ടിയുടെ ബന്ധുക്കൾക്കായി അന്വേഷണം

ന്യൂഡൽഹി: ദ്വാരകയി​ൽ ദമ്പതികൾക്ക്​ നേരെയുണ്ടായ ആക്രമണത്തിൽ ബന്ധുക്കൾക്കായി അന്വേഷണം. ബന്ധുക്കളുടെ നേതൃത്വത്തിൽ നടത്തിയ വെടിവെപ്പിൽ 23കാരനായ വിനയ്​ ദഹിയ കൊല്ലപ്പെടുകയും പരിക്കേറ്റ 19കാരിയായ കിരണിന്​ മാരകമായി പരിക്കേൽക്കുകയും ചെയ്​തിരുന്നു. വ്യാഴാഴ്​ച രാത്രി ദ്വാരകയിലെ അംബർഹായ്​ ഗ്രാമത്തിൽ കിരണി​െൻറ ബന്ധുക്കളായ മൂന്നുപേർ ഉൾപ്പെടെ അഞ്ചുപേരുടെ നേതൃത്വത്തിലായിരുന്നു ആക്രമണം. രണ്ടു തോക്കുകൾ ഉപയോഗിച്ച്​ വിനയ്​ക്കും കിരണിനും നേരെ 11ഒാളം വെടികളുതിർത്തതായി പൊലീസ്​ പറഞ്ഞു.

ഹരിയാന സോനിപത്തിലെ ഗോപാൽപുർ ഗ്രാമവാസികളാണ്​ ദമ്പതികൾ. ആഗസ്​റ്റിൽ ഇരുവരും ഒളിച്ചോടുകയും കോടതിയിൽ അഭയം തേടി വിവാഹം കഴിക്കുകയുമായിരുന്നു. ഒരേ ഗ്രാമത്തിലെ ഒരേ ഗോത്ര വിഭാഗത്തിൽ ഉൾപ്പെട്ടവരായിരുന്നിട്ടും ഇരുവരുടെയും കുടുംബം വിവാഹത്തിന്​ എതിർപ്പ്​ അറിയിക്കുകയായിരുന്നു. ഒരേ ഗോത്രത്തി​ൽപ്പെട്ടവർ തമ്മിലുള്ള വിവാഹം ഗ്രാമത്തിൽ നിരോധിച്ചുവെന്നും അവ വ്യഭിചാരമായി കണക്കാക്കുമെന്നുമായിരുന്നു വിനയ്​യുടെ കുടുംബത്തി​െൻറ പ്രതികരണം.

വിനയ്​യും കിരണും വിവാഹിതരായതോടെ ഗ്രാമത്തിൽ പഞ്ചായത്ത്​ വിളിച്ചുചേർക്കുകയും ഇരുവർക്കും ഗ്രാമത്തിൽ പ്രവേശിക്കുന്നതിന്​ വിലക്കേർപ്പെടുത്തുകയും ചെയ്​തിരുന്നു. കൂടാതെ കുടുംബങ്ങൾക്ക്​​ ഇരുവരെയും കാണാനോ ബന്ധപ്പെടാനോ ശ്രമിക്കരുതെന്ന്​ നിർദേശം നൽകുകയും ചെയ്​തു.

വിവാഹത്തിനുശേഷം വിനയ്​യും കിരണും പഞ്ചാബ്​-ഹരിയാന ഹൈകോടതിയെ സംരക്ഷണം ആവശ്യപ്പെട്ട്​ സമീപിച്ചിരുന്നു. തുടർന്ന്​ സോനിപത്ത്​ ​പൊലീസിനോട്​ ദമ്പതികൾക്ക്​ സംരക്ഷണം നൽകാൻ നിർദേശം നൽകുകയും ചെയ്​തു. എന്നാൽ, സംരക്ഷണം ആവശ്യപ്പെട്ട്​ തങ്ങളെ ആരും സമീപിച്ചില്ലെന്നായിരുന്നു സോനിപത്തിലെ മുതിർന്ന പൊലീസ്​ ഉദ്യോഗസ്​ഥ​െൻറ പ്രതികരണം. സംഭവത്തിൽ സോനിപത്ത്​ എസ്​.പി ജഷൻദീപ്​ രാൻധവ പ്രതികരിക്കാൻ തയാറാകുകയും ചെയ്​തില്ല.

തുടർന്ന്​, ദമ്പതികൾ ഡൽഹിയിലെത്തുകയും അംബർഹായ്​ ഗ്രാമത്തിൽ വാടകവീട്ടിൽ കഴിയുകയുമായിരുന്നു. ടാക്​സി സ്വന്തമാക്കിയ വിനയ്​ സ്വകാര്യ എയർലൈൻ കമ്പനിയിൽ ജോലി ചെയ്​തിരുന്നു. കിരൻ ഗർഭിണിയായിരുന്നെങ്കിലും രണ്ടുമൂന്ന്​ ദിവസം മുമ്പ്​ അലസിപ്പോയതായി വിനയ്​യുടെ പിതാവ്​ ഒാം പ്രകാശ്​ പറഞ്ഞു.

വ്യാഴാഴ്​ച രാത്രി ഇരുവരും താമസിക്കുന്ന അപാർട്ട്​മെൻറിൽ നാലോളം പേർ എത്തുകയായിരുന്നു. വാതിൽ തുറന്നയുടനെ കിരണിന്​ നേരെ അവർ വെടിയുതിർത്തു. നാലു വെടിയുതിർത്തതിൽ മൂന്നെണ്ണം കിരണിനേറ്റു. ഒരെണ്ണം ഭർത്താവിനും -മുതിർന്ന പൊലീസ്​ ഉദ്യോഗസ്​ഥൻ കിരണി​െൻറ മൊഴിയെ ഉദ്ധരിച്ച്​ പറഞ്ഞു.

പരിക്കേറ്റ കിരൺ നിലവിളിച്ച്​ വീടിന്​ മുകളിലേക്ക്​ ഒാടി. വിനയ്​ വീടിന്​ പുറത്തേക്കും. തുടർന്ന്​ വിനയ്​യെ അക്രമികൾ പിന്തുടർന്ന്​ കൊലപ്പെടുത്തുകയായിരുന്നു. കിരൺ വീടിന്​ മുകളിൽനിന്ന്​ സഹായത്തിനായി അലറി വിളിക്കുകയും ചെയ്യുകയായിരുന്നുവെന്ന്​ ദമ്പതികളുടെ വീട്ടുടമസ്​ഥയായ ജ്യോതി പറഞ്ഞു.

രക്തത്തിൽ കുളിച്ച നിലയിലായിരുന്നു പ്രദേശവാസികൾ കിരണി​നെ കണ്ടെത്തിയത്​. വിനയ്​ സംഭവ സ്​ഥലത്തുവെച്ചുത​ന്നെ മരിച്ചിരുന്നു. തുടർന്ന്​ കിരണിനെ ആശുപത്രിയിലെത്തിക്കുകയും പൊലീസിനെ വിവരം അറിയിക്കുകയുമായിരുന്നുവെന്ന്​ പ്രദേശവാസികൾ പറഞ്ഞു.

സംഘത്തിലെ രണ്ടുപേരാണ്​ വെടിയുതിർത്തത്​. ഇതി​െൻറ ദൃശ്യങ്ങൾ പ്രദേശത്തെ അഞ്ചോളം സി.സി.ടി.വി ദൃശ്യങ്ങളിൽ പതിഞ്ഞു. വിനയ്​യുടെ വയറിനും നെഞ്ചിനുമാണ്​ വെടിയേറ്റത്​. കിരണി​െൻറ വയറിലും കഴുത്തി​െൻറ ഭാഗത്തും വെടിയേറ്റിട്ടുണ്ട്​.

'കിരണി​െൻറ മൊഴി രേഖ​പ്പെടുത്തി. സഹോദരൻ അമൻ, ബന്ധുവായ വിക്കി, അമ്മാവൻ ശക്​തി എന്നിവരാണ്​ ​ആക്രമണത്തിന്​ പിന്നി​ലെന്ന്​ കിരൺ പറഞ്ഞു' -ഡി.സി.പി അറിയിച്ചു.

സംഭവത്തിൽ ദുരഭിമാനക്കൊലക്ക്​ കേസെടുത്തതായി പൊലീസ്​ പറഞ്ഞു. പ്രതികൾ ഒളിവിലാണെന്നും കിരണി​െൻറ പിതാവിനെയും മറ്റൊരു അമ്മാവനെയും ചോദ്യം ചെയ്യ​ുമെന്നും പൊലീസ്​ കൂട്ടിച്ചേർത്തു.