ലശ്​കർ ബന്ധമാരോപിച്ച്​ 2006 മുതൽ തടവിലായിരുന്നയാളെ വിട്ടയക്കണമെന്ന്​ സുപ്രീംകോടതി

ന്യൂഡൽഹി: 2006 മുതൽ കർണാടകയിലെ കൽബുർഗി ജയിലിൽ തടവിലായിരുന്നയാളെ വിട്ടയക്കണമെന്ന്​ സുപ്രീംകോടതി. ജീവപര്യന്ത്യം തടവിൽ ഇളവ്​ അനുവദിച്ചതിനെ തുടർന്നാണ്​ സുപ്രീംകോടതി ഇയാളെ വിട്ടയക്കാൻ ഉത്തരവിട്ടത്​. ശിക്ഷകാലാവധി ഇയാൾ പൂർത്തിയാക്കിയതായി കോടതി നിരീക്ഷിച്ചു.

അബ്​ദുൽ റഹ്​മാൻ എന്ന ഷാമി അഹമ്മദിനെ വിട്ടയക്കാനാണ്​ എൽ.നാഗേശ്വര റാവു ഉൾ​െപ്പട്ട സുപ്രീംകോടതി ബെഞ്ച്​ നിർദേശിച്ചത്​. അബ്​ദുൽ റഹ്​മാന്‍റെ കൈയിൽ നിന്നും ഒരു പിസ്റ്റളും രണ്ട്​ ഗ്രനേഡും പിടിച്ചെടുത്തിരുന്നു. ഇയാൾക്ക്​ ലശ്​കർ-ഇ-ത്വയിബ ബന്ധമുണ്ടെന്നായിരുന്നു പൊലീസ്​ ആരോപണം. തുടർന്ന്​ പ്രതിയെ യു.എ.പി.എ നിയമപ്രകാരം രാജ്യത്തിനെതിരെ യുദ്ധം നടത്തിയെന്ന കുറ്റത്തിന് വിചാരണ കോടതി​ ജീവപര്യന്തം തടവിന്​ ശിക്ഷിച്ചു. എന്നാൽ, പ്രതിയുടെ അപ്പീലിൽ കർണാടക ഹൈകോടതി ജീവപര്യന്തം തടവ്​ റദ്ദാക്കി.

തുടർന്ന്​ വിട്ടയക്കണമെന്ന്​ ആവശ്യപ്പെട്ട്​ അബ്​ദുൽ റഹ്​മാൻ സുപ്രീംകോടതിയെ സമീപിക്കുകയായിരുന്നു. 2006 മാർച്ച്​ 30ന്​ ചെന്നൈ-മുംബൈ ട്രെയിൻ യാത്രക്കിടെ ഗുൽബർഗ റെയിൽവേ സ്​റ്റേഷനിൽ നിന്ന്​ അബ്​ദുൽ റഹ്​മാനെ പിടികൂടുകയായിരുന്നു. ഇയാളിൽ നിന്നും രണ്ട്​ പിസ്റ്റലുകളും ഗ്രനേഡും പിടിച്ചെടുത്തിരുന്നു.