വികാസ്​ ദുബെ സംഭവം സുപ്രീംകോടതി ജഡ്​ജിയുടെ മേൽനോട്ടത്തിൽ​ അന്വേഷിക്കണമെന്ന്​ കോൺഗ്രസ്​

ന്യൂഡൽഹി: കുപ്രസിദ്ധ കുറ്റവാളി വികാസ്​ ദുബെ പൊലീസ്​ ഏറ്റുമുട്ടലിൽ കൊല്ലപ്പെട്ട കേസിൻെ റ അന്വേഷണം സുപ്രീംകോടതി ജഡ്​ജിയുടെ മേൽനോട്ടത്തിലാവണമെന്ന്​ മുതിർന്ന കോൺഗ്രസ് നേതാവ്​ പി.എൽ. പുനിയ​. പ്രത്യേക അന്വേഷണ സംഘത്തിനാണ് ​(എസ്​.ഐ.ടി) അന്വേഷണ ചുമതല.

‘‘ഏറ്റുമുട്ടലിനൊപ്പം മറ്റ്​ 5-6 സംഭവങ്ങൾ കൂടി അന്വേഷിക്കാനായി സംസ്ഥാന സർക്കാറാണ്​ പ്രത്യേക അന്വേഷണ സംഘത്തിന്​ രൂപം നൽകിയത്​. അന്വേഷണത്തിൽ മുൻപരിചയമില്ലാത്ത അഡീഷണൽ ചീഫ്​ സെക്രട്ടറി സഞ്​ജയ്​ ഭൂസ്​റെഡ്​ഡിയാണ്​ സംഘത്തിന്​ നേതൃത്വം നൽകുന്നത്​. ഇക്കാര്യത്തിൽ സംസ്ഥാന സർക്കാർ വ്യക്തത നൽകണം. ഈ കേസുമായി ബന്ധപ്പെട്ട്​ ധാരാളം ചോദ്യങ്ങൾ ഉയരുന്നുണ്ട്​. സുപ്രീംകോടതിയിലെ സിറ്റിങ്​ ജഡ്​ജിയോട്​ ഈ കേസിന്​ മേൽനോട്ടം വഹിക്കാൻ ആവശ്യപ്പെടണം.’’ -പി.എൽ. പുനിയ പറഞ്ഞു. 

നമ്മുടെ എട്ട്​ ധീരരായ പൊലീസുകാരെ കൊലപ്പെടുത്തിയ ശേഷം സ്ഥലം വിട്ട വികാസ്​ ദുബെ ഏറ്റുമുട്ടലിൽ കൊല്ലപ്പെടുകയായിരുന്നു. ഇതേതുടർന്ന് രാഷ്​ട്രീയക്കാരുമായും മുതിർന്ന ഉദ്യോഗസ്ഥരുമായുള്ള​ വികാസ്​ ദുബെയുടെ പരിചയമടക്കം വിവിധ ചോദ്യങ്ങൾ​ ഉയരാനിടയായി. ആരാണ്​ വികാദ്​ ദുബെയുടെ രാഷ്​ട്രീയ മാർഗദർശിയെന്ന കാര്യത്തിലും അന്വേഷണം നടക്കണമെന്നും അദ്ദേം പറഞ്ഞു. 

കാൺപുർ ഏറ്റുമുട്ടലിലെ മുഖ്യപ്രതിയായ വികാസ്​ ദുബെ മധ്യപ്രദേശിലെ ഉജ്ജയിനിൽ വെച്ച്​ വ്യാഴാഴ്​ച രാവിലെ അറസ്​റ്റിലാവുകയും വെള്ളിയാഴ്​ച ഏറ്റുമുട്ടലിൽ കൊല്ലപ്പെടുകയുമായിരുന്നു​.