കള്ളപ്പണം വെളുപ്പിക്കൽ: ജാമ്യ വ്യവസ്ഥകൾ ഭരണഘടനാവിരുദ്ധമെന്ന്​ സുപ്രീംകോടതി

ന്യൂഡൽഹി: കള്ളപ്പണം വെളുപ്പിൽ തടയൽ നിയമത്തിലെ ജാമ്യവ്യവസ്ഥകൾ സുപ്രീംകോടതി റദ്ദാക്കി. കള്ളപ്പണ നിരോധ നിയമത്തിലെ 45ാം വ്യവസ്ഥ ഭരണഘടനാവിരുദ്ധമാണെന്നും സുപ്രിംകോടതി വിധിച്ചു. നിയമത്തിലെ ജാമ്യവ്യവസ്ഥയിലുള്ള വീഴ്​ചകൾ നരേന്ദ്രമോദി സർക്കാറി​​െൻറ അനാസ്ഥയാണെന്നും ജസ്​റ്റിസ്​ റോഹിൻടൺ എഫ്​. നരിമാൻ അധ്യക്ഷനായ ബെഞ്ച്​ വിമർശിച്ചു.  കള്ളപ്പണ ഇടപാടുകളില്‍ കുറ്റക്കാരെന്ന് കണ്ടെത്തുന്നവര്‍ക്ക് ശിക്ഷ നല്‍കുന്നതിന് ഏറ്റവും സഹായകമായ വ്യവസ്ഥകളാണിതെന്ന കേന്ദ്രസര്‍ക്കാര്‍ വാദത്തിനേറ്റ തിരിച്ചടിയാണ് കോടതിവിധി.

കള്ളപ്പണ കേസിൽ പിടിക്കപ്പെട്ടാൽ ജാമ്യം അനുവദിക്കുന്നതുമായി ബന്ധപ്പെട്ട് രണ്ട് വ്യവസ്ഥകളാണ് നിയമത്തിലുള്ളത്.  പബ്ലിക് പ്രോസിക്യൂട്ടർക്ക്​ ജാമ്യാപേക്ഷ എതിർക്കാനുള്ള അവസരം നൽകാതെ ജാമ്യം നല്‍കരുത് എന്നതാണ് ഒന്നാമത്തെ വ്യവസ്ഥ. രണ്ടാമത്തേത്​ കേസില്‍ കുറ്റാരോപിതന്‍ നിരപരാധിയാണെന്ന് കോടതിക്ക് പ്രഥമദൃഷ്ട്യാ ബോധ്യപ്പെട്ടാല്‍ മാത്രമേ ജാമ്യം അനുവദിക്കാവൂ എന്നതാണ്. ഈ രണ്ടു വ്യവസ്ഥകളും ജാമ്യം നിഷേധത്തിനേ വഴിവെക്കൂയെന്നും കോടതി വിലയിരുത്തി.

 ഇതുവരെ ജാമ്യമെന്നത്​ നിയമവും ജയില്‍ അപവാദവും ആകണമെന്ന പ്രമാണം ഇതിന്‍പ്രകാരം ജയില്‍ നിയമവും ജാമ്യം അപവാദവുമായി മാറിയെന്നും കോടതി അഭിപ്രായപ്പെട്ടു. 45ാം വ്യവസ്ഥയുടെ സാധുത ചോദ്യം ചെയ്ത് സമര്‍പ്പിച്ച ഹര്‍ജികളിന്‍മേലായിരുന്നു കോടതി വിധി. ഈ വ്യവസ്ഥകളിന്മേല്‍ കീഴ്‌ക്കോടതികള്‍ ജാമ്യം നിഷേധിച്ച്​ ജയിലിൽ കഴിയുന്ന  മുഴുവന്‍ പേരുടെയും ജാമ്യാപേക്ഷ എത്രയും വേഗം പരിഗണിക്കാനും കോടതി ഉത്തരവിട്ടു.