അവിഹിത സ്വത്ത്​ സമ്പാദന കേസ്​; ശശികലയുടെ അടുത്ത ബന്ധു വി.എൻ. സുധാകരനും ജയിൽ മോചിതനായി

ബംഗളൂരു: തമിഴ്​നാട്ടിൽ അവിഹിത സ്വത്ത്​ സമ്പാദന കേസിൽ എ.ഐ.എ.ഡി.എം.കെ മുൻ നേതാവ്​ ശശികലക്കൊപ്പം ജയിൽ ശിക്ഷ വിധിച്ച അടുത്ത ബന്ധു വി.എൻ. സുധാകരൻ ജയിൽ മോചിതനായി. നാലു​വർഷത്തെ ജയിൽ വാസത്തിന്​ ശേഷമാണ്​ ശനിയാഴ്ച ജയിൽ മോചിതനായത്​.

ബംഗളൂരുവിലെ പരപ്പന അഗ്രഹാര ജയിലിലായിരുന്നു സുധാകരൻ. ഉടൻതന്നെ ബംഗളൂരുവിൽനിന്ന്​ ചെന്നൈയിലേക്ക്​ തിരിക്കുമെന്നാണ്​ വിവരം.

അവിഹിത സ്വത്ത്​ സമ്പാദനകേസിൽ ഏറ്റവും ഒടുവിൽ ജയിൽ മോചിതനാകുന്ന വ്യക്തിയാണ്​ സുധാകരൻ. ശശികലക്ക്​ പുറമെ ബന്ധുവായ ഇളവരശിയും ജയിൽ ശിക്ഷ അനുഭവിച്ചിരുന്നു. കൂടാതെ 10 കോടി രൂപ വീതം പിഴ​ അടക്കുകയും ചെയ്​തിരുന്നു.

2021 ജനുവരി 27നായിരുന്നു ശശികല ജയിൽ മോചിതയായത്​. ഇളവരശി ഫെബ്രുവരി അഞ്ചിനും. ഇരുവരും പിഴ അടക്കുകയും ചെയ്​തിരുന്നു. പിഴ അടക്കാൻ കഴിയാതെ വന്നതോടെ സുധാകരൻ ജയിലിൽ തന്നെ കഴിയുകയായിരുന്നു. പിഴ അടച്ചില്ലെങ്കിൽ ഒരു വർഷം കൂടി ശിക്ഷ അനുഭവിക്കണ​െമന്നും ശിക്ഷ വിധിയിലുണ്ടായിരുന്നു.

ശനിയാഴ്ച മറിന കടൽക്കരയിലെ മുൻ മുഖ്യമന്ത്രി ജെ. ജയലളിതയുടെ സമാധിയിൽ ശശികല കണ്ണീരോടെ ആദരാജ്ഞലികളർപിച്ചിരുന്നു. അവിഹിത സ്വത്ത്​ സമ്പാദന കേസിൽ ബംഗളുരു ജയിലിൽനിന്ന്​ മോചിതയായതിനുശേഷം ഇതാദ്യമായാണ്​ ജയലളിതയുടെ സഹായിയായി വർത്തിച്ചിരുന്ന വി.കെ ശശികല മറിന ബീച്ചിലെത്തിയത്​. ശനിയാഴ്​ച രാവിലെ 11 മണിയോടെ അണ്ണാ ഡി.എം.കെയുടെ കൊടിവെച്ച കാറിൽ ത്യാഗരായനഗറിലെ വസതിയിൽനിന്നാണ്​ ശശികല പുറപ്പെട്ടത്​. ​

ഇരുചക്രവാഹനങ്ങളിലും കാറുകളിലും മറ്റുമായി നൂറുകണകക്കിന്​ പ്രവർത്തകരും അനുഗമിച്ചു. മറിന കടൽക്കരയിൽ നുറുക്കണക്കിന്​ പ്രവർത്തകരും തടിച്ചുകൂടിയിരുന്നു. ജയലളിത സമാധിയിലെത്തിയ ശശികല കണ്ണീരോടെയാണ്​ പുഷ്​പാർച്ചന നടത്തി ആദരാജ്ഞലികളർപിച്ചത്​. ഇടക്കിടെ തൂവാല ഉപയോഗിച്ച്​ കണ്ണീർ തുടക്കുന്നുണ്ടായിരുന്നു. പത്ത്​ മിനിറ്റോളം തൊഴുകൈകളോടെ പ്രാർഥിച്ചു. ഇൗ സമയത്ത്​ പ്രവർത്തകർ 'ചിന്നമ്മ വാഴ്​ക', അണ്ണാ ഡി.എം.കെ ജനറൽ സെക്രട്ടറി ചിന്നമ്മ വാഴ്​ക, ത്യാഗ ശെൽവി ചിന്നമ്മ വാഴ്​ക' തുടങ്ങിയ മുദ്രാവാക്യങ്ങൾ മുഴക്കിയിരുന്നു. അണ്ണാദുരൈ, എം.ജി.ആർ എന്നിവരുടെ സമാധികളും ശശികല സന്ദർശിച്ചു.

നാല്​ വർഷം മുൻപ്​ ജയലളിത സമാധിയിൽ ​ ശപഥം ചെയ്​തതിനുശേഷമാണ്​ ബംഗളുരു പരപ്പന അഗ്രഹാര ജയിലിലേക്ക്​ പുറപ്പെട്ടത്​. ജയിൽവാസത്തിനുശേഷം ഫെബ്രു.ഒൻപതിനാണ്​ ശശികല ചെന്നൈയിൽ തിരിച്ചെത്തിയത്​. ശശികലയുടെ സന്ദർശനം ഒഴിവാക്കാൻ അന്നത്തെ അണ്ണാ ഡി.എം.കെ സർക്കാർ അറ്റകുറ്റപണികളുടെ പേരിൽ ജയലളിത സമാധി അടച്ചിട്ടിരിക്കുകയായിരുന്നു.