സുനന്ദയുടെ മരണം: കുറ്റപത്രം അപഹാസ്യകരമെന്ന്​ ശശി തരൂർ 

ന്യൂഡൽഹി: സുനന്ദ പുഷ്​കർ കേസിൽ ഡൽഹി പൊലീസ്​ സമർപ്പിച്ച കുറ്റപത്രം അപഹാസ്യകരമെന്ന്​ ശശി തരൂർ എം.പി. സുനന്ദ പുഷ്​കറെ അറിയുന്ന ആരും അവർ ആത്മഹത്യ ചെയ്തതാണെന്നോ അതിന്​ പ്രേരണയായത്​ താനാണെന്നോ വിശ്വസിക്കില്ല. നാലു വർഷത്തിലേറെ ഡൽഹി പൊലീസ്​ അന്വേഷിച്ച്​ ​ ആത്​മഹത്യയാണെന്നാണ്​ കണ്ടെത്തിയിരിക്കുന്നതെങ്കിൽ അത്​ ബാഹ്യ പ്രേരിതമാണെന്നും ശശി തരൂർ ട്വീറ്റ്​ ചെയ്​തു. 

ഒക്​ടോബർ ഏഴിന്​ ഡൽഹി ഹൈകോടതിയിൽ അഭിഭാഷകൻ അറിയിച്ചത്​ പൊലീസ്​ ആർക്കെതിരെയും ഒരു തെളിവും കണ്ടെത്തിയിട്ടില്ല എന്നാണ്​. എന്നാൽ ആറു മാസങ്ങൾക്കു ശേഷം തനിക്കെതിരെ ആത്മഹത്യ പ്രേരണ കുറ്റം ചുമത്തിയത്​ അവിശ്വസനീയമാണെന്നും തരൂർ ട്വിറ്ററിലൂടെ പ്രതികരിച്ചു. 

ശശി തരൂരിനെതിരെ പട്യാല ഹൗസ്​ കോടതിയിലാണ്​ പൊലീസ്​ കുറ്റപത്രം സമർപ്പിച്ചത്​. ഇന്ത്യൻ ശിക്ഷ നിയമത്തിലെ 498(a)(ഗാർഹീക പീഡനം),306(ആത്​മഹത്യ പ്രേരണ) വകുപ്പുകളാണ്​ തരൂരിനെതിരെ ചുമത്തിയിരിക്കുന്നത്​. സുനന്ദയു​ടേത്​ ആത്​മഹത്യയാണെന്നാണ്​ ഡൽഹി പൊലീസ്​ കണ്ടെത്തൽ. പത്ത്​ വർഷം വരെ തടവ്​ ശിക്ഷ ലഭിക്കാവുന്ന കുറ്റങ്ങളാണ്​ തരൂരിനെതിരെ ചുമത്തിയിരിക്കുന്നത്​. ഇൗ മാസം 24ന്​ കേസിൽ വീണ്ടും വാദം കേൾക്കും.

ഡൽഹിയിലെ ആഡംബര ഹോട്ടലിൽ  2014 ജനുവരി 17നാണ്​ സുനന്ദ പുഷ്​കറിനെ കൊല്ലപ്പെട്ട നിലയിൽ കണ്ടെത്തിയത്​. വിഷം ഉള്ളിൽ ചെന്ന്​ മരിച്ചതെന്നായിരുന്നു പ്രാഥമിക നിഗമനം.