പ്രക്ഷോഭം അടിച്ചമർത്തുന്നത്​ അവസാനിപ്പിക്കണം; രാഷ്​ട്രപതിക്ക്​ സംയുക്ത കിസാൻ മോർച്ചയുടെ കത്ത്​

ന്യൂഡൽഹി: കേന്ദ്രസർക്കാറിന്‍റെ കാർഷിക നിയമങ്ങൾക്കെതിരായ കർഷക പ്രക്ഷോഭങ്ങളെ അടിച്ചമർത്താൻ ശ്രമിക്കുന്ന കേന്ദ്ര നടപടിക്കെതിരെ രാഷ്​ട്രപതിക്ക്​ സംയുക്ത കിസാൻ മോർച്ചയുടെ കത്ത്​. പ്രക്ഷോഭം അടിച്ചമർത്താൻ ശ്രമിക്കുന്ന കേന്ദ്ര നിലപാട്​ അവസാനിപ്പിക്കണം എന്നാവശ്യപ്പെട്ടാണ്​ കത്ത്​.

കള്ളകേസുകൾ ചുമത്തി നൂറിലധികം നിരപരാധികളായ കർഷകരെ കേന്ദ്രം ജയിലിൽ അടച്ചു. ഇവർക്കെതിരെ ചുമത്തിയ കേസുകൾ പിൻവലിച്ച്​ ഉടൻ വിട്ടയക്കണം. കർഷക നേതാക്കൾക്കെതിരെ പൊലീസും മറ്റു കേ​ന്ദ്ര ഏജൻസികളും നോട്ടീസ്​ അയക്കുന്നതും അന്വേഷണം പ്രഖ്യപിക്കുന്നതും നിർത്തണം -കർഷക സംഘടന രാഷ്​ട്രപതി രാംനാഥ്​ കോവിന്ദിന്​ അയച്ച കത്തിൽ പറയുന്നു.

സംയുക്ത കിസാൻ മോർച്ചയെ കൂടാതെ താലൂക്ക്​ -ജില്ല അടിസ്​ഥാനത്തിൽ പ്രവർത്തിക്കുന്ന നിരവധി കർഷക സംഘടനകളും രാഷ്​ട്രപതിക്ക്​ നിവേദനം സമർപ്പിക്കും. കർഷക സമരത്തോടനുബന്ധിച്ച്​ ടൂൾ കിറ്റ്​ കേസിൽ അസ്റ്റിലായ യുവ പരിസ്​ഥിതി പ്രവർത്തക ദിശ രവിക്ക്​ ജാമ്യം അനുവദിച്ചതിനെ മോർച്ച സ്വാഗതം ചെയ്യുകയും ചെയ്​തു.