ബാർജ്​ ദുരന്തം: ചുഴലിക്കാറ്റ്​ മുന്നറിയിപ്പ്​ ക്യാപ്​റ്റൻ അവഗണിച്ചു; കുറ്റം ബാർജ്​ ഉടമക്കെന്ന്​ ഒ.എൻ.ജി.സി

മുംബൈ: ടോ​ട്ടെ ചുഴലിക്കാറ്റ്​ മഹാഭീതിയായി ആഞ്ഞുവീശുമെന്ന്​ കപ്പലുകൾക്ക്​ മുന്നറിയിപ്പ്​ നൽകിയിരുന്നുവെന്നും എന്നാൽ, മുങ്ങിയ ബാർജിലെ ക്യാപ്​റ്റൻ നിർദേശങ്ങൾ അവഗണിച്ച്​ കടലിൽ തുടരുകയായിരുന്നുവെന്നും ആരോപണം. ഒ.എൻ.ജി.സിക്കു കീഴിലെ ജോലിയായിരുന്നു ബാർജിന്​. മൊത്തം 99 കപ്പലുകൾ ഇതേ ദൗത്യവുമായി ആഴക്കടലിലുണ്ടായിരുന്നുവെന്നും 94ഉം മുന്നറിയിപ്പ്​ പാലിച്ച്​ തിരിച്ചെത്തിയതായും ഒ.എൻ.ജി.സി പറയുന്നു.

ടോ​ട്ടേ ആഞ്ഞുവീശിയതോടെ അർധരാത്രിക്കു ശേഷമാണ്​ ബാർജ്​ നങ്കൂരം തകർന്ന്​ നിയന്ത്രണം വിട്ട്​ റിഗ്ഗിൽ ഇടിച്ചുമുങ്ങിയത്​. ദുരന്തത്തിൽ രണ്ടു മലയാളികൾ ഉൾപെടെ 49 കപ്പൽ ജീവനക്കാരുടെ മൃതദേഹങ്ങൾ കണ്ടെടുത്തിട്ടുണ്ട്​. ക്യാപ്​റ്റൻ ഉൾപെടെ 37 പേരെ കുറിച്ച്​ ഇനിയും വിവരമില്ല. ഇവർക്കായി തിരച്ചിൽ തുടരുകയാണ്​. നങ്കൂരം തകർന്നയുടൻ വിവരം മുംബൈയിൽ ഷിപ്പിങ്​ മന്ത്രാലയത്തിനു കീഴിലെ കേന്ദ്രത്തിൽ അറിയിച്ചിരുന്നുവെങ്കിൽ രക്ഷാനടപടികൾ കൈ​ക്കൊള്ളാനാകുമായിരുന്നുവെന്ന്​ മന്ത്രാലയം വൃത്തങ്ങൾ പറഞ്ഞു. പിറ്റേന്ന്​ രാവിലെ 10 മണിയോടെയാണ്​ മന്ത്രാലയത്തിൽ വിവരമറിയുന്നത്​. അപ്പോഴേക്ക്​ ചുഴലിക്കാറ്റ്​ മുംബൈ തീ​രത്തേക്ക്​ പ്രവേശിച്ചിരുന്നു. വൈകുന്നേരം അഞ്ചു മണിയോടെ പി.305 ബാർജ്​ പൂർണമായി മുങ്ങുകയും ചെയ്​തു. മൊത്തം 261 പേരാണ്​ കപ്പലിലുണ്ടായിരുന്നത്​. ഇവരിൽ 186 പേരെ രക്ഷ​പ്പെടുത്തി.

മുന്നറിയിപ്പിനെ തുടർന്ന്​ ബാർജ്​ 200 മീറ്റർ മാറ്റിയിട്ടിരുന്നു. കൊടുങ്കാറ്റി​െൻറ വേഗതയും ബാർജ്​ നിന്ന സ്​ഥലവും പരിഗണിച്ച്​ ഇത്​ സുരക്ഷിതമെന്ന്​ ക്യാപ്​റ്റൻ വിശ്വസിച്ചതാകാമെന്ന്​ കരുതുന്നു.