You are here

പ്രജ്ഞ സിങ് പ്രധാനമ​ന്ത്രിയുടെ പ്രവർത്തനങ്ങളെ വെല്ലുവിളിക്കുന്നു -ഉവൈസി

14:30 PM
22/07/2019
Asaduddin-Owaisi-22.07.2019

ന്യൂഡൽഹി: ശൗചാലയം വൃത്തിയാക്കാനല്ല താൻ എം.പി ആയതെന്ന പ്രജ്ഞ സിങ്​ ഠാക്കൂറിൻെറ പ്രസ്​താവനക്കെതിരെ ആൾ ഇന്ത്യ മജ്​ലിസെ ഇത്തിഹാദുൽ മുസ്​ലിമീൻ (എ.ഐ.എം.ഐ.എം) അധ്യക്ഷൻ അസദുദ്ദീൻ ഉവൈസി. പ്രധാനമ​ന്ത്രി നരേന്ദ്ര മോദിയുടെ പ്രവർത്തനങ്ങളെ വെല്ലു വിളിക്കുകയാണ്​ പ്രജ്ഞ സിങ്​ എന്ന്​ അദ്ദേഹം പറഞ്ഞു. 

താൻ സവർണ ജാതിക്കാരി ആയതിനാൽ ശൗചാലയം വൃത്തിയാക്കുന്നവരെ തുല്യതയോടെ കാണാൻ സാധിക്കില്ലെന്നാണ്​ അവർ പറയുന്നത്​. അവർ എങ്ങനെയാണ്  ഇങ്ങനെ പുതിയ ഇന്ത്യ നിർമിക്കുകയെന്നും ഉവൈസി ചോദിച്ചു.

ഞായറാഴ്​ചയാണ്​ ഭോപാൽ ബി.ജെ.പി എം.പി സാധ്വി പ്രജ്ഞ സിങ്​ ഠാക്കൂർ വൃത്തിഹീനത സംബന്ധിച്ച്​ പരാതി പറയാനെത്തിയ സെഹോർ എന്ന സ്ഥലത്തെ ബി.ജെ.പി പ്രവർത്തകരെ അപമാനിച്ച്​ സംസാരിച്ചത്​. ‘‘ഞങ്ങൾ തെരഞ്ഞെടുക്കപ്പെട്ടത് നിങ്ങളുടെ​ ഓവുചാൽ വൃത്തിയാക്കാനോ ശൗചാലയം വൃത്തിയാക്കാനോ അല്ല. ഞാൻ എന്തിനാണോ തെരഞ്ഞെടുക്കപ്പെട്ടത്​, ആ ജോലി സത്യസന്ധമായി ചെയ്യും. ഇക്കാര്യം മുമ്പ്​ പറഞ്ഞതാണ്​, ഇനിയും പറയും.’’ എന്നായിരുന്നു പ്രജ്ഞ സിങ്​ ഠാക്കൂറിൻെറ വാക്കുകൾ​.

ഒന്നാം നരേന്ദ്ര മോദി സർക്കാറിൻെറ സ്വച്ഛ്​ ഭാരത്​ പദ്ധതിയെ ബി.ജെ.പി ഉയർത്തിക്കാട്ടുന്നതിനിടെയാണ്​ പ്രജ്​ഞ സിങ്​ ഇത്തരത്തിൽ പ്രതികരിച്ചത്​. 2008ലെ മാലേഗാവ്​ സ്​ഫോടന കേസിൽ പ്രതിയാണ്​ പ്രജ്ഞ സിങ്​ ഠാക്കൂർ. മഹാത്മാ ഗാന്ധിയുടെ ഘാതകൻ നാഥൂറാം വിനായക ഗോഡ്​സേ ദേശ ഭക്തനാണെന്ന്​ പറഞ്ഞ്​ ഇവർ വിവാദം സൃഷ്​ടിച്ചിരുന്നു. ഇൗ പ്രസ്​താവനയെ തള്ളി പറഞ്ഞ പ്രധാനമന്ത്രി നരേന്ദ്രമോദി ഇത്​ ഒരിക്കലും പൊറുക്കാനാവാത്തതാണെന്ന്​ വ്യക്തമാക്കിയിരുന്നു.

Loading...
COMMENTS