മൻസുഖ്​ ഹിരേന്‍റെ ദുരൂഹ മരണം; സച്ചിൻ വാസെ അറസ്​റ്റിലായേക്കും

മുംബൈ: മുകേഷ്​ അംബാനിയുടെ വീടിനടുത്ത്​ സ്​ഫോടക വസ്​തുക്കളുമായി കണ്ടെത്തിയ സ്​കോർപിയോവുടെ ഉടമ മൻസുഖ്​ ഹിരേന്‍റെ ദുരൂഹ മരണവുമായി ബന്ധപ്പെട്ട കേസിൽ അസി. ഇൻസ്​പെക്​ടർ സച്ചിൻ വാസെയുടെ അറസ്​റ്റിന്​ സാധ്യത. അറസ്​റ്റ്​ സാധ്യത തെളിഞ്ഞതോടെ സച്ചിൻ വാസെ മുൻകൂർ ജാമ്യാപേക്ഷയുമായി വെള്ളിയാഴ്​ച താണെ സെഷൻസ്​ കോടതിയെ സമീപിച്ചു. സച്ചിന്‍റെ അപേക്ഷയിൽ സർക്കാറിന്‍റെയും പൊലിസിന്‍റെയും പ്രതികരണം തേടിയ കോടതി ഹരജി വെള്ളിയാഴ്​ചത്തേക്ക്​ മാറ്റിവിച്ചു. ഹരജിയിൽ വിധി പറയുംവരെ അറസ്​റ്റിൽ നിന്ന്​ ഇടക്കാല സംരക്ഷണം നൽകണമെന്ന സച്ചിന്‍റെ അപേക്ഷ കോടതി തള്ളി.

അതെസമയം, ലോകത്തോട്​ 'ഗുഡ്​ബൈ' പറയാനുളള സമയം അടുത്തുവരികയാണെന്ന സച്ചിൻ വാസെയുടെ വൈകാരിക വാട്​സ്​ ആപ്പ്​ സ്​റ്റാറ്റസ്​ ചർച്ചയായി. 2004 ആവർത്തിക്കുകയാണെന്നും തന്‍റെ സഹപ്രവർത്തകർ തനിക്കെതിരെ കെണിയൊരുക്കുകയാണെന്നും വാട്​സ്​ ആപ്പ്​ സ്​റ്റാറ്റസിൽ പറയുന്നു. 2002 ലെ ഘാട്കൂപ്പർ സ്​ഫോടന കേസിൽ പിടിയിലായ ഖ്വാജ യൂനുസ്​ ശൈഖിന്‍റെ കസ്​റ്റഡി മരണ കേസിലാണ് സച്ചിൻ 2004 ൽ അറസ്​റ്റിലായത്​. കേസിൽ വിചാരണ പൂർത്തിയായിട്ടില്ല. സസ്​പെൻഷനിലായിരുന്ന സച്ചിനെ കഴിഞ്ഞ ജൂണിലാണ്​ ശിവസേന നയിക്കുന്ന മഹാ വികാസ്​ അഗാഡി സർക്കാർ ജോലിയിൽ തിരിച്ചെടുത്തത്​. ഇതിനെതിരെ ഖ്വാജ യൂനുസിന്‍റെ മാതാവ്​ ഹൈക്കോടതിയെ സമീപിച്ചിട്ടുണ്ട്​.

ജോലിയിൽ തിരിച്ചെത്തിയ സച്ചിനെ ക്രൈം ഇൻറലിജൻസ്​ യൂണിറ്റിലാണ്​ (സി.െഎ.യു) നിയമിച്ചത്​. അർണബ്​ ഗോസ്വാമിക്കെതിരായ ടി.ആർ.പി തട്ടിപ്പ്​, അൻവെ നായിക്​ ആത്​മഹ്യ കേസുകൾ അന്വേഷിച്ചിരുന്നതും അൻവെ നായിക്​ കേസിൽ അർണബിനെ അറസ്​റ്റ്​ ചെയ്​തതും സച്ചിൻവാസെയാണ്​. പുൽവാമ, ബലാകോട്ട്​ സൈനിക മിന്നലാക്രമണം തുടങ്ങിയ ദേശസുരക്ഷ വിവരങ്ങൾ പങ്കുവെക്കുന്ന അർണബും ബാർക്ക് മുൻ മേധാവി പാർഥ ദാസ്​ ഗുപ്​തയും തമ്മിലെ വിവാദ വാട്​സ്​ ആപ്പ്​ ചാറ്റുകൾ കണ്ടെത്തിയതും സച്ചിനാണ്​.

മൻസുഖ്​ ഹിേരെനെ സച്ചിൻ വാസെ കൊലപ്പെടുത്തിയതാണെന്ന്​ ഹിരേന്‍റെ ഭാര്യ വിമല ആരോപിച്ചതോടെ സച്ചിന്‍റെ അറസ്​റ്റിന്​ ബി.ജെ.പി മുറവിളികൂട്ടിയിരുന്നു. സ്​ഫോടക വസ്​തുക്കളുമായി കണ്ടെത്തിയ സ്​കോർപിയോ കഴിഞ്ഞ നവമ്പർ മുതൽ ഫെബ്രുവരി അഞ്ച്​ വരെ സച്ചിന്‍റെ കെെവശമായിരുന്നുവെന്നും വിമല ആരോപിച്ചു. ബി.ജെ.പി സച്ചിനെതിരെ നിലപാട്​ കടുപ്പിച്ചതോടെ വെള്ളിയാഴ്​ച സച്ചിനെ സി.െഎ.യുവിൽ നിന്ന്​ സിറ്റിസൺ ഫെസിലിറ്റേഷൻ സെൻററിലേക്ക്​ മാറ്റി.