സചിന്​ വേണ്ടി ഹാജരാകുന്നത്​ റോഹ്​തഗിയും ഹരീഷ് സാൽവെയും; എല്ലാം ബി.ജെ.പി പ്ലാനിങ്ങെന്ന്​ വിമർശനം

ജയ്​പൂർ: എം.എൽ.എ സ്​ഥാനത്തുനിന്ന്​ അയോഗ്യരാക്കിയ നടപടിക്കെതിരെ കോടതിയെ സമീപിച്ച സചിൻ പൈലറ്റിന്​ വേണ്ടി ഹാജരാകുന്നത്​ പ്രമുഖ അഭിഭാഷകരായ ​മുൻ അറ്റോർണി ജനറൽ മുകുൾ റോഹ്​തഗിയും ഹരീഷ് സാൽവെയും. ബി.ജെ.പി ആഭിമുഖ്യമുള്ള ഇരുവരും സചിന്​ വേണ്ടി വാദിക്കാനെത്തുന്നതോടെ, ബി.ജെ.പി ആസൂത്രണം ചെയ്യുന്ന നാടകമാണ്​ അരങ്ങേറുന്നതെന്നാണ്​ വ്യാപക​ ആരോപണം. 

വ്യാഴാഴ്ചയാണ്​ തന്നെയും 18 എം.എൽ.എമാരെയും അ​േയാഗ്യരാക്കിയതിനെതിരെ നാടകീയമായി സചിൻ രാജസ്ഥാൻ ഹൈകോടതിയെ സമീപിച്ചത്​. കോൺഗ്രസിന്​ വേണ്ടി മുതിർന്ന അഭിഭാഷകനും രാജ്യസഭാ എം.പിയുമായ അഭിഷേക് മനു സിങ്‌വിയാണ്​ ഹാജരാകുന്നത്​. പൈലറ്റ് ബി.ജെ.പിയിൽ ചേരുമെന്നതി​​െൻറ സൂചനയായാണ്​ റോഹ്​തഗിയെയും സാൽ‌വെയെയും തെരഞ്ഞെടുത്തതെന്നാണ്​​ ആക്ഷേപം.

2014ൽ ബി.ജെ.പി സർക്കാർ അധികാരത്തിലെത്തിയ ശേഷമാണ്​ മുകുൾ റോഹ്​തഗി ഇന്ത്യയുടെ അറ്റോർണി ജനറലായി നിയമിതനായത്​. സാൽവെയും ബി.ജെ.പി സർക്കാരിന്​ വേണ്ടി വിവിധ കേസുകളിൽ വക്കാലത്തെടുത്തിരുന്നു. തെരഞ്ഞെടുപ്പിൽ കൃത്രിമം കാണിച്ചതിന് ഗുജറാത്ത് ഹൈകോടതി അയോഗ്യനാക്കിയ ബി.ജെ.പി നേതാവ് ഭൂപേന്ദ്രസിങ് ചുദാസാമക്ക്​ വേണ്ടി സുപ്രീംകോടതിയിൽ ഹാജരായത്​ സാൽവേ ആയിരുന്നു.  കടുത്ത സംഘ്​പരിവാർ നയം പുലർത്തുന്ന റിപ്പബ്ലിക്​ ടി.വിയിലെ അർണബ് ഗോസ്വാമിക്ക്​ വേണ്ടി വാദിക്കാനെത്തിയതും ഇദ്ദേഹമാണ്​. 

ഉപമുഖ്യമന്ത്രി സ്​ഥാനത്തുനിന്ന്​ പുറത്താക്കപ്പെട്ട സചിൻ പൈലറ്റിനും അനുയായികളായ 18 എം.എൽ.എമാർക്കും അയോഗ്യത നോട്ടീസ്​ അയച്ചതായി സ്​പീക്കർ സി.പി. ജോഷി അറിയിച്ചിരുന്നു. നോട്ടീസിന്​ നിയമസാധുതയില്ലെന്നും അശോക്​ ഗെഹ്​​േലാട്ട്​ സർക്കാറി​​​​​െൻറ താൽപര്യം മാത്രമാണ്​ നോട്ടീസിലെന്നും ചൂണ്ടിക്കാട്ടിയാണ്​ പൈലറ്റ്​ കോടതിയെ സമീപിച്ചത്​. 

തനിക്കും മറ്റു 18 എം.എൽ.എമാർക്കും നോട്ടീസ്​ നൽകിയത്​ സംബന്ധിച്ച്​ തെരഞ്ഞെടുപ്പ്​ കമീഷനോട്​ അന്വേഷിച്ചതായും വിവരമുണ്ട്​. ഗെഹ്​ലോട്ട്​ സർക്കാരി​​​​​െൻറ നിർദേശപ്രകാരം രണ്ടാം നിയമസഭ കക്ഷി യോഗത്തിലും പ​െങ്കടുക്കാത്തതിനെ തുടർന്ന്​ സ്​പീക്കർ ​പൈലറ്റിനും സഹ എം.എൽ.എമാർക്കും അയോഗ്യത നോട്ടീസ്​ അയക്കുകയായിരുന്നു. 

യോഗത്തിൽ പ​െങ്കടുക്കാത്തതും സർക്കാറിനെ അട്ടിമറിക്കാൻ ശ്രമിക്കുന്നുവെന്നതു​ം ചൂണ്ടിക്കാട്ടി ഉപമുഖ്യമന്ത്രി സ്ഥാനത്തുനിന്നും പി.സി.സി അധ്യക്ഷ സ്​ഥാനത്തുനിന്നും പൈലറ്റിനെ പുറത്താക്കുകയും ചെയ്​തിരുന്നു. എന്നാൽ പൈലറ്റി​​​​​െൻറ അടുത്ത നീക്കം വ്യക്തമല്ല. അ​േദ്ദഹം ബി.ജെ.പിയിൽ ചേരില്ലെന്ന്​ നേരത്തേ അറിയിച്ചിരുന്നു. ഇതിനിടെയാണ്​ മുകുൾ റോഹ്​തഗിയെയും ഹരീഷ് സാൽവെയെയും അഭിഭാഷകരായി തെര​ഞ്ഞെടുത്തത്​.