സചിൻ പൈലറ്റിനെ കേന്ദ്രനേതൃത്വത്തിൽ എത്തിക്കുമെന്ന്​ സൂചന;​ ചിദംബരവുമായി സംസാരിച്ചു

ന്യൂഡൽഹി: വിമതനേതാവ്​ സചിൻ പൈലറ്റിനെ കേന്ദ്രനേതൃത്വത്തിലേക്ക്​ എത്തിച്ച്​ രാജസ്​ഥാൻ കോൺഗ്രസിൽ ഉടലെടുത്ത​ പ്രതിസന്ധി പരിഹരിക്കാൻ നീക്കം. സചിൻ പൈലറ്റിനെ ​​കേന്ദ്രനേതൃത്വത്തിലേക്ക്​ ഉൾപ്പെടു​ത്തുന്നതി​​​െൻറ സാധ്യതകൾ പരിശോധിക്കുമെന്ന്​ മുതിർന്ന നേതാവ്​ പി. ചിദംബരം സൂചന നൽകി.

രാജസ്​ഥാൻ കോൺഗ്രസ്​ മന്ത്രിസഭയിൽ രാഷ്​ട്രീയ അനിശ്ചിതത്വങ്ങൾ തുടരുന്നതിനിടെ സചിൻ പൈലറ്റ്​   ചിദംബരവുമായി ഫോണിൽ സംസാരിച്ചിരുന്നു. തന്നെയും 18 വിമത എം.എൽ.എമാരെയും അയോഗ്യരാക്കിയ നടപടിക്കെതിരെ സചിൻ രാജസ്​ഥാൻ ഹൈകോടതിയെ സമീപിച്ചതിന്​ ശേഷമാണ്​ പുതിയ നീക്കം. 

മുതിർന്ന നേതാവി​​​െൻറ അഭിപ്രായം അറിയാനായി സചിൻ ചിദംബരവുമായി ഫോണിൽ ബന്ധപ്പെടുകയായിരുന്നുവെന്ന്​ ദേശീയ മാധ്യമങ്ങൾ റിപ്പോർട്ട്​ ചെയ്​തു. മുഖ്യമന്ത്രി അശോക്​ ഗെഹ്​ലോട്ടുമായി അസ്യാരസ്യങ്ങൾ ഉടലെടുത്തതോടെ പ്രിയങ്ക ഗാന്ധി ഉൾപ്പെടെ മുതിർന്ന നേതാക്കൾ സചിനുമായി സംസാരിച്ചിരുന്നു. എന്നാൽ സചിൻ പൈലറ്റ്​ വഴങ്ങിയിരുന്നില്ല. ​ആദ്യമായാണ്​ സചിൻ പൈലറ്റ് കോൺഗ്രസി​​​െൻറ മുതിർന്ന നേതാക്കളിലൊരാളോട്​ ​ അഭിപ്രായം ആരായുന്നത്​​. 

കോൺഗ്രസ്​ നേതൃത്വം സചിനെ ചർച്ചക്കായി വിളിക്കുമെന്നും പ്രശ്​നങ്ങൾ അവിടെ തീർക്കാമെന്നും ഈ അവസരം പ്രയോജനപ്പെടുത്താൻ ഉപദേശം നൽകിയതായും ചിദംബരം പറഞ്ഞു. സചിൻ പൈലറ്റും വിമത എം.എൽ.എമാരും നടത്തിയ നീക്കം അടഞ്ഞ അധ്യായമാണെന്നും പിരിച്ചുവിട്ട നടപടി ​​‘സാ​ങ്കേതികത്വം’ മാത്രമാണെന്നും​ ചിദംബരം പറഞ്ഞതായാണ്​ വിവരം.  

തുടർച്ചയായ രണ്ടാംവട്ടവും രാജസ്​ഥാൻ നിയമസഭ കക്ഷി യോഗത്തിൽ പ​ങ്കെടുക്കാത്തതിലും ബി.ജെ.പിയുമായി ചേർന്ന്​ സർക്കാരിനെ അട്ടിമറിക്കാൻ ശ്രമിച്ചുവെന്ന ആരോപണത്തെ തുടർന്നും സചിൻ പൈലറ്റിനെ ഉപമുഖ്യമന്ത്രി സ്​ഥാനത്തുനിന്ന്​ നീക്കുകയും 18 എം.എൽ.എമാരെ ഉൾപ്പെടെ അയോഗ്യരാക്കുകയും ചെയ്​തിരുന്നു. കോൺഗ്രസ്​ പി.സി.സി അധ്യക്ഷ സ്​ഥാനത്തുനിന്നും സചിനെ നീക്കിയിരുന്നു. അയോഗ്യരാക്കിയ നടപടിക്കെതിരെ സചിൻ രാജസ്​ഥാൻ ഹൈകോടതിയെ സമീപിച്ചിരിക്കുകയാണ്​.