ശബരിമല വിഷയത്തിൽ രാഷ്​ട്രീയം കളിക്കാൻ അനുവദിക്കില്ലെന്ന്​ മീണ

തിരുവനന്തപുരം: ബി.ജെ.പി, കോൺഗ്രസ്​ വിമർശനങ്ങൾക്കിടെ ശബരിമല പ്രചാരണവിഷയമാക്കരുതെന്ന നിലപാട്​ ആവർത്തിച്ച്​ മ ുഖ്യ തെരഞ്ഞെടുപ്പ് ഓഫിസർ ടിക്കാറാം മീണ. ദൈവങ്ങളെയും ആരാധനാലയങ്ങളെയും മുന്‍നിര്‍ത്തിയുളള പ്രചാരണം പെരുമാറ്റച്ചട്ടലംഘനമാണെന്ന്​ അദ്ദേഹം പറഞ്ഞു. ഇവ രാഷ്​ട്രീയ മത്സരത്തിൽനിന്ന് ഒഴിവാക്കണം. രണ്ട്​ സമുദായങ്ങൾ തമ്മിൽ വിദ്വേഷമോ കലാപമോ ഉണ്ടാക്കാൻ വഴിയൊരുക്കുന്ന പ്രസംഗം നടത്തിയാൽ നടപടിയെടുക്കും. കലക്​ടർമാർക്കും മൈക്രോ​ നിരീക്ഷകർക്കും നിർദേശം നൽകും. തെരഞ്ഞെടുപ്പ്​ പെരുമാറ്റച്ചട്ടം കർശനമായി പാലിക്കുമെന്നും അദ്ദേഹം വ്യക്തമാക്കി.

തിങ്കളാഴ്​ച വാർത്തസമ്മേളനത്തിലാണ്​ ശബരിമല പ്രചാരണത്തിന്​ ഉപയോഗിക്കരുതെന്ന നിലപാട്​ മുഖ്യതെരഞ്ഞെടുപ്പ്​ ഒാഫിസർ വ്യക്തമാക്കിയത്​​. ഇതിനെതിരെ ബി.ജെ.പിയും കോൺഗ്രസും രംഗത്തുവന്നു. സി.പി.എം കമീഷ​ൻ നിലപാട്​ സ്വാഗതം ചെയ്​തു.

തെരഞ്ഞെടുപ്പുമായി ബന്ധപ്പെട്ട വിഷയങ്ങൾ ചർച്ച ചെയ്യാൻ ബുധനാഴ്​ച രാവിലെ കമീഷൻ രാഷ്​ട്രീയ പാർട്ടികളുടെ യോഗം ​വിളിച്ചിട്ടുണ്ട്​. ഇതിൽ മുഖ്യതെരഞ്ഞെടുപ്പ്​ ഒാഫിസർ രാഷ്​ട്രീയ പാർട്ടികളെ നിലപാട്​ നേരിട്ട്​ അറിയിക്കും.