ക്രിസ്​ത്യൻ പുരോഹിതൻമാരുടെ ലൈംഗിക പീഡനം പ്രത്യേകമായി അന്വേഷിക്കണമെന്ന്​ ആർ.എസ്​.എസ്​ വാരിക

ന്യൂഡൽഹി: ക്രിസ്​ത്യൻ പുരോഹിതൻമാരുടെ ലൈംഗിക പീഡനങ്ങൾ ഇന്ത്യയിലും പ്രത്യേകമായി അന്വേഷിക്കണമെന്ന്​ ആർ.എസ്​.എസ്​ വാരികയായ പാഞ്ചജന്യ. വാരികയുടെ പുതിയ ലക്കം കവർ സ്​റ്റോറിയിലൂടെയാണ്​ലോകമെമ്പാടും ഇത്തരം പരാതികൾ ഉയർന്ന സാഹചര്യത്തിൽ ഇന്ത്യയിലും പ്രത്യേക അന്വേഷണം വേണമെന്ന്​ ആവശ്യപ്പെട്ടത്​.

1950 മുതൽ ഫ്രാൻസിലെ കത്തോലിക ചർച്ചുകളിലെ പുരോഹിതരും മറ്റും പീഡനത്തിനിരയാക്കിയത്​ മൂന്ന്​ ലക്ഷത്തിലേറെ കുട്ടികളെയെന്ന്​ അന്വേഷണ റിപ്പോർട്ട് പുറത്തുവന്നിരുന്നു​. ഇതിൽ ഭൂരിഭാഗവും 10നും 13നും ഇടയിൽ പ്രായമുള്ള ആൺകുട്ടികളാണെന്നും ഇരകൾക്കുനേരെ കത്തോലിക്ക സഭ നിന്ദ്യമായ സമീപനമാണ്​ സ്വീകരിച്ചതെന്നും റിപ്പോർട്ടിൽ പറഞ്ഞിരുന്നു അന്വേഷണ റിപ്പോർട്ടിനെ കുറിച്ചറിഞ്ഞ ഫ്രാൻസിസ്​ മാർപാപ്പ അഗാധ ദുഃഖം പ്രകടിപ്പിച്ചിരുന്നു. ഈ സാഹചര്യത്തിലാണ്​ പാഞ്ചജന്യ പ്ര​ത്യേക അന്വേഷണം ആവശ്യപ്പെട്ടത്​.

ഇത്തരം കേസുകൾ ഇന്ത്യയിലും ധാരാളമായി നടക്കുന്നുണ്ടെന്ന്​ പാഞ്ചജന്യ ആരോപിച്ചു. ജാർഖണ്ഡ്​, കേരള, എന്നിവിടങ്ങളിൽ സമാനമായ ഒരുപാട്​ സംഭവങ്ങളുണ്ടായതായും പറയുന്നു. കേരളത്തിൽ കന്യാസ്​ത്രീകളുടെ എണ്ണം 25 ശതമാനമായി താഴ്​ന്നുവെന്നും അതിനാൽ തന്നെ ഛത്തീസ്​ഗഢ്​, ജാർഖണ്ഡ്​, ഹിമാചൽ പ്രദേശ്​, ഒഡീഷ തുടങ്ങിയ സംസ്ഥാനങ്ങളിൽ നിന്നുള്ള പാവപ്പെട്ട പെൺകുട്ടികളെ വഞ്ചിച്ചും നിർബന്ധിച്ചും സഭ സ്വന്തമാക്കുകയാണെന്നും പാഞ്ചജന്യ ആരോപിച്ചു.