ആർ.എസ്​.എസ്​ രാജ്യത്തെ ഭരണഘടനാ സ്​ഥാപനങ്ങളെ തകർത്തു -രാഹുൽ ഗാന്ധി

തൂത്തുക്കുടി: ആസൂത്രിതമായ ആക്രമണങ്ങളിലൂടെ ആർ.എസ്​.എസ്​ രാജ്യത്തെ ഭരണഘടനാ സ്​ഥാപനങ്ങ​െള തകർക്കുകയാണെന്ന്​ കോൺഗ്രസ്​ നേതാവ്​ രാഹുൽ ഗാന്ധി. തെരഞ്ഞെടുക്കപ്പെട്ട സർക്കാറുകളെ അട്ടിമറിക്കുകയും മാധ്യമസ്​ഥാപനങ്ങളേയും മാധ്യമപ്രവർത്തകരേയും ആക്രമിക്കുകയുമാണ് ആർ.എസ്​.എസും സംഘവുമെന്നും രാഹുൽ പറഞ്ഞു.

​'ഒരു രാഷ്ട്രം അതിലെ ഭരണഘടനാ സ്ഥാപനങ്ങൾ തമ്മിലുള്ള സന്തുലിതാവസ്ഥയിലാണ്​ നിലനിൽക്കുന്നത്​. സന്തുലിതാവസ്ഥ നഷ്​ടമായാൽ രാഷ്ട്രം അസ്വസ്ഥമാകും. അതാണ് കേന്ദ്ര ആശയം. ജനങ്ങൾ തെരഞ്ഞെടുക്കപ്പെട്ട സ്ഥാപനങ്ങളായ ലോക്സഭ, നിയമസഭ, പഞ്ചായത്തുകൾ പിന്നെ ജുഡീഷ്യറി സ്വതന്ത്ര മാധ്യമങ്ങൾ ഇതൊക്കെയാണ്​ രാജ്യത്തെ നിലനിർത്തുന്നത്​. ഇതാണിപ്പൊ ആക്രമിക്കപ്പെടുന്നത്​' -തൂത്തുക്കുടിയിലെ വി‌ഒ‌സി കോളേജിൽ സംസാരിക്കവെ രാഹുൽ പറഞ്ഞു.

'കഴിഞ്ഞ ആറ് വർഷമായി കാണുന്നത് ഈ സ്ഥാപനങ്ങൾക്കെതിരായ ആസൂത്രിതമായ ആക്രമണമാണ്. ജനാധിപത്യം ഒറ്റയടിക്കായിരിക്കില്ല ഇല്ലാതാകുന്നത്​. അത് പതുക്കെയാണ്​ മരിക്കുന്നത്​. ഇന്ത്യയിലെ ജനാധിപത്യം മരിച്ചുവെന്ന് നിങ്ങളോട് പറയാൻ എനിക്ക് സങ്കടമുണ്ട്. അത് നിലവിലില്ല. ആർ‌എസ്‌എസ് വൻതോതിൽ ധനസമ്പാദനം നടത്തി നമ്മുടെ സ്ഥാപനപരമായ സന്തുലിതാവസ്ഥയെ നശിപ്പിച്ചു. അതാണ് സംഭവിച്ചത്' -അദ്ദേഹം പറഞ്ഞു. 'രാജ്യദ്രോഹ നിയമത്തിന്‍റെ ദുരുപയോഗം, ആളുകളെ കൊല്ലുക, ഭീഷണിപ്പെടുത്തുക ഇവയെല്ലാം പ്രശ്നത്തിന്‍റെ ലക്ഷണങ്ങളാണ്. വൻതോതിൽ പണം സ്വരുക്കൂട്ടി ആർ‌.എസ്‌.എസ്​ രാജ്യത്തെ സ്ഥാപന സന്തുലിതാവസ്ഥയെ നശിപ്പിക്കുകയായിരുന്നു'-രാഹുൽ പറഞ്ഞു.