യു.പിയിൽ പൊലീസു​കാരെ നടുറോഡിൽ വളഞ്ഞിട്ട്​ തല്ലി​ ആർ.എസ്​.എസുകാർ; വിഡിയോ പുറത്ത്​

മഥുര: ഉത്തർപ്രദേശിൽ നടുറോഡിൽ പൊലീസിനെ വളഞ്ഞിട്ട്​ മർദിച്ച്​ ആർ.എസ്​.എസ്​ പ്രവർത്തകർ. വൃന്ദാവനിലെ കുംഭ്​ പ്രദേശത്താണ്​ സംഭവം. പ്രചാരകിനോട്​ മോശമായി പെരുമാറിയെന്ന്​​ ആരോപിച്ചായിരുന്നു മർദനം. പൊലീസുകാരെ നടുറോഡിലിട്ട്​ തല്ലുന്ന വിഡിയോ സമൂഹമാധ്യമങ്ങളിൽ വൈറലായി.

കുംഭമേള നടക്കുന്നതിനിടെ യമുന നദിയിൽ കുളിച്ചുകൊണ്ടിരുന്ന ആർ.എസ്​.എസ്​ ജില്ല പ്രചാരക്​ മനോജ്​ കുമാറിനോട്​ മോശമായി പെരുമാറിയെന്ന്​ ആരോപിച്ച്​ ചില പൊലീസുകാരുമായി തർക്കമുണ്ടാകുകയായിരുന്നു. ഇതാണ്​ അക്രമത്തിൽ കലാശിച്ചത്​. എസ്​.ഐക്കും നാലു ​പൊലീസുകാർക്കുമായിരുന്നു മർദനം.

യമുന നദിയിൽ കുളിച്ചതിന്​ ശേഷം മനോജ്​ കുമാർ നദി കുറുകെ കടക്കാൻ ശ്രമിച്ചത്​ പൊലീസുകാർ തടഞ്ഞു. നദിയിലേക്ക്​ ഇറങ്ങരുതെന്ന്​ ആവശ്യപ്പെടുകയും ചെയ്​തു. ഇതേ തുടർന്ന്​ പൊലീസുകാരെ ആർ.എസ്​.എസുകാർ വളഞ്ഞു. എസ്​.ഐയെയും പൊലീസുകാരെയും മർദിക്കുന്നതും ഹെൽമറ്റ്​ കൊണ്ട്​ അടിക്കുന്നതും വിഡിയോയിൽ കാണാം.

സംഘർഷത്തെ കുറിച്ച്​ അറിഞ്ഞതോടെ​ കൂടുതൽ ആർ.എസ്​.എസ്​ -ബി.ജെ.പി പ്രവർത്തകർ സ്​ഥലത്തെത്തി. കോട്ട്​വാലി പ്രദേശത്ത്​ തടിച്ചുകൂടിയവർ പൊലീസുകാർക്കെതിരെ മുദ്രാവാക്യം വിളിക്കുകയും ഭീഷണി മുഴക്കുകയുമായിരുന്നു​. ഇതോടെ ജില്ല മജിസ്​ട്രേറ്റും എസ്​.എസ്​.പിയും മുതിർന്ന പൊലീസ്​ ഉദ്യോഗസ്​ഥരും ഗോകുൽ എം.എൽ.എ പുരാൻ പ്രകാശും സ്​ഥലത്തെത്തി.

പ്രചാരകിനോട്​ മോശമായി പെരുമാറിയ പൊലീസുകാർക്കെതിരെ നടപടിയെടുക്കണമെന്ന്​ ആവശ്യപ്പെട്ടായിരുന്നു ആർ.എസ്​.എസ്​ -ബി.ജെ.പി പ്രവർത്തകരുടെ പ്രതിഷേധം. പൊലീസുകാരെ ആക്രമിച്ച മനോജ്​ കുമാറിന്‍റെ സഹായിയെ അറസ്റ്റ്​ ചെയ്​തു.

സംഭവത്തിൽ നാലു​പൊലീസുകാർക്കെതിരെ കേസെടുക്കുകയും ചെയ്​തു. കൊലപാതക ശ്രമത്തിനാണ്​ കേസെടുത്തിരിക്കുന്നത്​. കൂടാതെ മഥുര എസ്​.എസ്​.പി രണ്ടു പൊലീസുകാരെ സസ്​പെൻഡ്​ ചെയ്യുകയും ഹോം ഗാർഡിനെതിരെ നടപടിയെടുക്കുകയും ചെയ്​തു. വൃന്ദാവൻ കോട്​വാലി പൊലീസ്​ സ്​റ്റേഷൻ ചാർജുണ്ടായിരുന്ന അനുജ്​ കുമാറിന്​ സ്​ഥാനത്തുനിന്ന്​ മാറ്റുകയും ചെയ്​തു. അക്രമം അരങ്ങേറിയതോടെ ബി.ജെ.പി ആർ.എസ്​.എസ്​ പ്രവർത്തകരെ പിരിച്ചുവിടാൻ ലാത്തിചാർജ്​ നടത്തിയെന്ന്​ ചൂണ്ടിക്കാട്ടിയാണ്​ നടപടി.