ക്രിസ്​ത്യൻ പള്ളിയിൽ അതിക്രമിച്ചുകയറി സംഘ്​പരിവാർ പ്രവർത്തകർ; പാസ്റ്ററെ അറസ്റ്റ്​ ചെയ്യണമെന്ന്​ ബി.ജെ.പി എം.എൽ.എ

ബാംഗ്ലൂർ: ബജ്​റംഗ്​ദൾ, വിശ്വഹിന്ദു പരിഷത്ത്​ അടക്കമുള്ള സംഘ്​പരിവാർ പ്രവർത്തകർ ക്രിസ്​ത്യൻ പള്ളിയിൽ അതിക്രമിച്ചു കയറി ഭജന ചൊല്ലി. കർണാടകയിലെ ഹൂബ്ലിയിൽ ഞായറാഴ്​ച രാവിലെയാണ്​ സംഭവം. നിർബന്ധിത മതപരിവർത്തനം നടത്തുന്ന​ുവെന്ന്​ ആരോപിച്ച്​ പ്രതിഷേധ സൂചകമായാണ്​ പള്ളിയിൽ ഭജന ചൊല്ലിയത്​.

സ്​ത്രീകളും പുരുഷൻമാരും അടക്കമുള്ള സംഘം ഭജന ചൊല്ലുന്നതിന്‍റെ വിഡിയോയും പുറത്തുവന്നിട്ടുണ്ട്​. തുടർന്ന്​ മതപരിവർത്തനം നടത്തുന്ന പാസ്റ്റർ സോമു അവരധിയെ അറസ്റ്റ്​ ചെയ്യണമന്നാവശ്യപ്പെട്ട്​ ബി.ജെ.പി എം.എൽ.എ അരവിന്ദ്​ ബെല്ലദ്​ റോഡ്​ തടയൽ സമരം നടത്തി.

പള്ളിയിൽ വെച്ച്​ ഹിന്ദുത്വവാദികൾ തന്നെ ആക്രമിച്ചെന്ന്​ ആരോപിച്ച്​ പാസ്റ്റർ ആശു​പത്രിയിൽ പ്രവേശിച്ചിരുന്നു​. അതേ സമയം പട്ടികജാതിക്കാരെയും ഗോത്ര വിഭാഗക്കാരെയും നിർബന്ധിച്ച്​ മതപരിവർത്തനം നടത്തുന്നുവെന്ന്​ ആരോപിച്ച്​ പാസ്റ്ററെ പൊലീസ്​ അറസ്റ്റ്​ ചെയ്​തു.

''വിശ്വനാഥ്​ എന്നുപേരുള്ള ഒരാളെ മതപരിവർത്തനം ചെയ്യാൻ ശ്രമിച്ചിരുന്നു. എന്നാൽ ഇയാൾ ചർച്ചിൽ നിന്നും പോയി പാസ്റ്ററെ അറസ്റ്റ്​ ചെയ്യണമെന്ന്​ പൊലീസിൽ പരാതിപ്പെട്ടു. തുടർന്ന്​ ഞങ്ങളുടെ പ്രവർത്തകർ ഒരുമിച്ച്​ പള്ളിയിൽ കയറി ഭജന പാടുകായിരുന്നു'' -ബജ്​റംഗ്​ദൾ സംസ്ഥാന കൺവീനർ രഘു സഖ്​ലേഷ്​ പൊര പ്രതികരിച്ചു.